नाशिक-पुणे हायस्पीड रेल्वेला गती देण्यासाठी मुख्यमंत्र्यांची उद्या बैठक

मुंबई : नाशिक-पुणे हायस्पीड रेल्वे मार्ग आणि राहुरी-शनिशिंगणापूर रेल्वे प्रकल्पासंदर्भात महत्त्वपूर्ण हालचाली सुरू झाल्या आहेत. या दोन्ही प्रकल्पांबाबत नाशिक, अहिल्यानगर आणि पुणे जिल्ह्यातील लोकप्रतिनिधींचे शिष्टमंडळ १ जुलै रोजी मुख्यमंत्री देवेंद्र फडणवीस (CM Devendra Fadanvis) यांची भेट घेणार आहे. केंद्र सरकारच्या स्तरावर पाठपुरावा करून सकारात्मक तोडगा काढण्यासाठी प्रयत्न करण्यात येतील, अशी माहिती जलसंपदा मंत्री राधाकृष्ण विखे पाटील यांनी दिली.

https://prahaar.in/2026/06/30/works-worth-%e2%82%b95-63-crore-for-the-conservation-of-the-asiatic-library-target-set-to-complete-by-the-end-of-july/

विधानभवनात आयोजित बैठकीत नाशिक-पुणे हायस्पीड रेल्वे मार्गावर सविस्तर चर्चा झाली. बैठकीला विविध जिल्ह्यांतील आमदार उपस्थित होते, तर माजी मंत्री दिलीप वळसे पाटील यांनी दूरदृश्य प्रणालीद्वारे सहभाग घेतला. (Nashik Pune High Speed Rail)

https://prahaar.in/2026/06/30/green-maharashtra-focus-on-planning-for-the-plantation-of-11-crore-trees-in-the-state-chief-minister-fadnavis-issues-orders/

राधाकृष्ण विखे पाटील यांनी सांगितले की, या रेल्वे मार्गाबाबत केंद्रीय रेल्वेमंत्री अश्विनी वैष्णव यांच्यासोबतही चर्चा केली जाणार आहे. यासाठी लोकप्रतिनिधींचे शिष्टमंडळ दिल्लीत जाऊन त्यांची भेट घेणार आहे. हा प्रकल्प नाशिक, अहिल्यानगर आणि पुणे जिल्ह्यांच्या सर्वांगीण विकासासाठी महत्त्वाचा असून पुणे आणि नाशिकदरम्यान वेगवान संपर्क निर्माण करेल, असे त्यांनी सांगितले.

राहुरी-शनिशिंगणापूर रेल्वे मार्गाबाबतही बैठकीत चर्चा झाली. या प्रकल्पासंदर्भातील शेतकऱ्यांच्या भावना मुख्यमंत्री देवेंद्र फडणवीस यांच्या निदर्शनास आणून देण्यात येणार असून या विषयावरही सकारात्मक निर्णयासाठी पाठपुरावा केला जाणार असल्याचे विखे पाटील यांनी स्पष्ट केले.

दरम्यान, माजी मंत्री दिलीप वळसे पाटील यांनी जीएमआरटीशी संबंधित अडचणी सोडविण्यासाठी केंद्र सरकारशी समन्वय साधण्याची गरज व्यक्त केली. परदेशातील अशाच प्रकल्पांचे उदाहरण देत मुख्यमंत्री यांच्या नेतृत्वाखाली केंद्राकडे प्रभावी पाठपुरावा करण्याची सूचना त्यांनी केली.