Nashik Kumbh Mela : आगामी नाशिक कुंभमेळा २०२७च्या पार्श्वभूमीवर कुंभमेळ्याशी संबंधित विविध कामकाजासाठी पंचवटी तपोवन येथील दिगंबर आखाड्यात महत्त्वपूर्ण नियुक्ती करण्यात आली आहे. अखिल भारतीय पंच दिगंबर अणी आखाडा यांच्या वतीने श्रीमंत रामकिशोरदास शास्त्री यांच्यावर कुंभमेळा व्यवस्थापनाशी संबंधित समन्वयाची जबाबदारी सोपविण्यात आली आहे.
कुंभमेळ्याच्या काळात आखाडे, खालसे तसेच स्थानिक मंदिरांना आवश्यक असलेल्या मूलभूत सुविधा, विविध अडचणी आणि प्रलंबित प्रश्न याबाबत शासन व प्रशासनाकडे पाठपुरावा करण्याचे महत्त्वाचे कार्य श्रीमंत रामकिशोरदास शास्त्री पार पाडणार आहेत. तसेच संबंधित विभागांशी समन्वय साधून साधू-महंतांच्या अपेक्षा प्रशासनापर्यंत पोहोचविण्याची जबाबदारी त्यांच्यावर राहणार आहे.
https://prahaar.in/2026/06/22/girish-mahajan-on-gokul-gite-victory/
या नियुक्तीनंतर दिगंबर आखाडा श्री नाशिक क्षेत्र आद्य संत-महंत चॅरिटेबल ट्रस्ट च्या वतीने श्रीमंत रामकिशोरदास शास्त्री यांचा शाल व श्रीफळ देऊन सत्कार करण्यात आला. यावेळी ट्रस्टच्या पदाधिकाऱ्यांनी सांगितले की, कुंभमेळ्याच्या नियोजनामध्ये साधू-संत, आखाडे, खालसे आणि स्थानिक धार्मिक स्थळांच्या सुविधा व समस्यांचा योग्य समन्वय होणे आवश्यक आहे. या दृष्टीने शास्त्री यांची भूमिका महत्त्वाची ठरणार आहे.
कुंभमेळ्याशी संबंधित बैठका, प्रशासनाशी होणाऱ्या चर्चा तसेच विविध विकासकामांबाबत आखाड्यांचे प्रतिनिधित्व करण्याचे कार्यही ते करणार आहेत. त्यांच्या नियुक्तीमुळे संत-महंतांमध्ये समाधान व्यक्त करण्यात येत असून त्यांच्यावर अभिनंदनाचा वर्षाव होत आहे. या प्रसंगी श्रीमंत रामसनेहीदास, महंत श्री रघुनंदनदासजी, महंत श्री शंकरदास, महंत श्री विष्णूदास, महंत श्री माधवदास, महंत श्री रामकिशोरदास, महंत श्री रामबाबूदास, महंत नरसिंगदास, महंत चंद्रमदास यांच्यासह अनेक संत-महंत उपस्थित होते. तसेच हरिभक्त पारायण माधवदाची राठी यांचीही प्रमुख उपस्थिती होती.
https://prahaar.in/2026/06/22/yellow-alert-for-nashik-city-tomorrow/
कुंभमेळा समन्वयाची महत्त्वपूर्ण जबाबदारी
अखिल भारतीय पंच दिगंबर अणी आखाड्याचे श्रीमंत विष्णूदास महाराज व उपश्रीमहंत माधवदास यांच्या हस्ते श्रीमंत रामकिशोरदास शास्त्री यांची ही नियुक्ती करण्यात आली. सर्व आखाड्यांतील संत-महंतांशी त्यांचे सलोख्याचे संबंध असून कुंभमेळ्याच्या कामकाजात त्यांचा अनुभव आणि समन्वयक भूमिका उपयुक्त ठरणार आहे. त्यांच्या नियुक्तीचे विविध स्तरातून स्वागत होत आहे.