मियामी (फ्लोरिडा) : फिफा विश्वचषक २०२६ मध्ये एका छोट्या देशाने फुटबॉल जगताला थक्क केले आहे. केवळ ५ लाख लोकसंख्या असलेला ‘केप व्हर्डे’ हा देश आता फुटबॉल विश्वात चर्चेचा केंद्रबिंदू ठरला आहे. स्पर्धेतील प्रबळ दावेदार असलेल्या उरुग्वेसारख्या बलाढ्य संघाला २-२ अशा बरोबरीत रोखून केप व्हर्डेने नॉकआऊट फेरीच्या शर्यतीत आपली दावेदारी अधिक मजबूत केली आहे.

https://prahaar.in/2026/06/22/belgium-vs-iran-fifa-world-cup-2026-belgium-faces-mounting-difficulties-after-a-goalless-draw-against-iran/

पिना आणि वारेलाचा ऐतिहासिक जलवा

केविन पिनाने २१ व्या मिनिटाला फ्री-किकवर गोल करत केप व्हर्डेसाठी विश्वचषकातील पहिला-वहिला गोल नोंदवला. या गोलने उरुग्वेच्या तगड्या बचावफळीला हादरवून सोडले. पहिल्या हाफमध्ये उरुग्वेने मॅक्सी अराउजो आणि ऑगस्टिन कानोबियो यांच्या गोलच्या जोरावर २-१ अशी आघाडी घेतली होती. मात्र, दुसऱ्या हाफमध्ये हेलिओ वारेलाने संधी साधत मुसलेराला चकवले आणि सामन्यात बरोबरी साधली. हा वारेलाचा पहिला आंतरराष्ट्रीय गोल ठरला.

https://prahaar.in/2026/06/22/fifa-world-cup-2026-18-year-old-yamal-sets-world-cup-record-spain-secures-a-big-win/

काय म्हणाले प्रशिक्षक?

सामन्यानंतर केप व्हर्डेचे प्रशिक्षक पेद्रो लेताओ ब्रितो यांनी आपल्या खेळाडूंचे कौतुक केले. “आम्ही हे दाखवण्यासाठी येथे आहोत की, एखादा देश आर्थिकदृष्ट्या लहान असू शकतो, पण जर खेळाडूंमध्ये जिद्द आणि संघर्षाची तयारी असेल, तर ते जगातील कोणत्याही मोठ्या संघाला टक्कर देऊ शकतात. आम्ही पुढील फेरीत जाण्यासाठी पूर्णपणे सज्ज आहोत,” असे त्यांनी सांगितले.

दुसरीकडे, उरुग्वेचे प्रशिक्षक मार्सेलो बिएल्सा यांनी आपल्या संघाच्या चुकांची जबाबदारी स्वीकारली. “आम्ही काही संघटनात्मक चुका केल्या, ज्याची मोठी किंमत आम्हाला मोजावी लागली. पुढील फेरीत जाण्यासाठी आम्हाला स्पेनविरुद्धच्या शेवटच्या सामन्यात जिंकावेच लागेल,” असे त्यांनी नमूद केले.

https://prahaar.in/2026/06/21/fifa-world-cup-2026-historic-feat-gallindez-makes-15-saves-in-90-minutes-shock-for-ecuador/

आकडेवारी आणि महत्त्वाचे क्षण

• ऐतिहासिक क्षण: केप व्हर्डे विश्वचषकासाठी पात्र ठरणारे लोकसंख्येनुसार तिसरे सर्वात लहान राष्ट्र आहे.

• गोलकीपर्सचा रेकॉर्ड: या सामन्यात ४० वर्षांहून अधिक वयाचे दोन गोलकीपर (वोझिन्हा आणि मुसलेरा) खेळले, जो एक अनोखा विक्रम ठरला.

• पुढील वाटचाल: गट ‘एच’ मध्ये उरुग्वे आणि केप व्हर्डे हे दोन्ही संघ आता पुढील सामन्यांवर लक्ष केंद्रित करत आहेत. सौदी अरेबियाविरुद्धच्या सामन्यात विजय मिळवल्यास केप व्हर्डे बाद फेरी गाठू शकतो.

https://prahaar.in/2026/06/21/fifa-world-cup-2026-a-superfast-world-cup-a-unique-event-occurred-in-just-33-matches/

मैदानावर केप व्हर्डेच्या खेळाडूंनी दाखवलेला आत्मविश्वास आणि गुणवत्तेने हे सिद्ध केले आहे की, फुटबॉलमध्ये ‘मोठा’ किंवा ‘लहान’ संघ नसून, केवळ जिद्द महत्त्वाची असते. या निकालानंतर केप व्हर्डेच्या चाहत्यांमध्ये आनंदाचे वातावरण असून, हा संघ या विश्वचषकातील ‘डार्क हॉर्स’ ठरला आहे.