नवी दिल्ली : ३ मे रोजी झालेली मूळ परीक्षा पेपर फुटीमुळे रद्द झाल्यानंतर, रविवारी देशभरात कडक सुरक्षेमध्ये ‘नीट-युजी २०२६’ फेरपरीक्षा पार पडली. या परीक्षेसाठी देशभरातून सुमारे २२ लाखांहून अधिक विद्यार्थी बसले होते. परीक्षा संपल्यानंतर विद्यार्थ्यांनी पेपरची पातळी ‘मध्यम ते कठीण’ अशी संमिश्र वर्णनाची असल्याचे सांगितले.

https://prahaar.in/2026/06/21/major-changes-to-the-right-to-information-act-new-rules-by-the-maharashtra-government-come-into-effect/

नवी दिल्ली, श्रीनगर, रांची आणि चेन्नई येथील उमेदवारांशी संवाद साधला असता, गेल्या वेळेपेक्षा यंदाचा पेपर काहीसा कठीण होता, असा सूर उमटला. अनेक विद्यार्थ्यांनी ‘बायोलॉजी’चा पेपर चांगला आणि ‘केमिस्ट्री’ मध्यम असल्याचे सांगितले; मात्र ‘फिजिक्स’चा भाग गेल्या वेळेपेक्षा जास्त कठीण आणि वेळखाऊ होता, अशी प्रतिक्रिया दिली. परीक्षा केंद्रांमधील अंतर्गत व्यवस्था आणि पालकांसाठी बसण्याची व सावलीची सोय नॅशनल टेस्टिंग एजन्सीकडून करण्यात आली होती. राजनैतिक आणि तांत्रिक सुरक्षिततेचा भाग म्हणून गुजरात, चंदीगड आणि उत्तर प्रदेशसह सर्व राज्यांमध्ये स्थानिक पोलीस आणि निमलष्करी दलाचा मोठा बंदोबस्त होता. परीक्षा केंद्रांवर सीसीटीव्ही कॅमेरे आणि ‘इसील-बेल’ कंपनीचे जॅमर्स बसवण्यात आले होते. उमेदवारांची ओळख पटवण्यासाठी अंगझडती कर्मचारी आणि बायोमेट्रिक कर्मचारी तैनात होते.

https://prahaar.in/2026/06/21/indian-womens-hockey-team-indian-womens-hockey-team-wins-nations-cup-title/

‘नीट’च्या नियमांनुसार दुपारी १:३० वाजता परीक्षा केंद्रांचे मुख्य गेट बंद करण्यात आले, ज्यानंतर आलेल्या विद्यार्थ्यांना प्रवेश नाकारण्यात आल्याने काही ठिकाणी तणाव निर्माण झाला. मुंबईतील परळ येथील महर्षी दयानंद कॉलेजबाहेर कुर्ला आणि डोंबिवली येथील दोन विद्यार्थी उशिरा पोहोचल्यामुळे त्यांना प्रशासनाने प्रवेश नाकारला, ज्यामुळे पालकांनी गेटबाहेर प्रचंड गोंधळ घातला.

बंगळुरूमध्ये काँग्रेसच्या रॅलीमुळे झालेल्या वाहतूक कोंडीत अडकल्याने ४ विद्यार्थी अवघ्या २ मिनिटांच्या उशिराने पोहोचले. मुख्य गेट बंद असल्याचे पाहून तीन विद्यार्थिनींनी थेट लोखंडी कठडे ओलांडून आत उडी मारली, तरीही अधिकाऱ्यांनी नियमांवर बोट ठेवत त्यांना परीक्षा हॉलमध्ये प्रवेश दिला नाही.

https://prahaar.in/2026/06/21/i-will-join-the-shiv-sena-omraje-nimbalkar/

दरम्यान, नागपूरच्या एका विद्यार्थ्याला थेट ‘अबु धाबी’ (युएई) हे परीक्षा केंद्र मिळाल्याने मोठा वाद निर्माण झाला होता, ज्यावर लोकसभेचे विरोधी पक्षनेते राहुल गांधी यांनीही प्रश्न उपस्थित केले होते. तथापि, एनटीएने स्पष्ट केले की विद्यार्थ्याने स्वतः करेक्शन विंडोदरम्यान हे केंद्र निवडले होते. परंतु पालकांच्या विनंतीनंतर आणि तातडीने पडताळणी करून एनटीएने शनिवारी त्याला नागपूरमधीलच ‘पीएम श्री केंद्रीय विद्यालय, अजनी’ हे केंद्र नव्याने दिले. अखेर या विद्यार्थ्याने नागपूरमध्येच परीक्षा दिली.