Alabama, USA: २०२६ फिफा विश्वचषकाच्या पार्श्वभूमीवर अर्जेंटिनाचा संघ आपल्या तयारीच्या अंतिम टप्प्यात आहे. गतविजेता अर्जेंटिना संघ आपला शेवटचा सराव सामना मंगळवारी (१० जून) आइसलँडविरुद्ध खेळणार आहे. या सामन्यात कर्णधार लिओनेल मेस्सी मैदानात उतरणार असल्याची अधिकृत पुष्टी मुख्य प्रशिक्षक लिओनेल स्कालोनी यांनी केली आहे.

https://prahaar.in/2026/06/09/fifa-predictions-by-paul-octopus/

मेस्सीचा सहभाग आणि वर्कलोड मॅनेजमेंट

हॅमस्ट्रिंगच्या दुखापतीमुळे मेस्सी ६ जून रोजी होंडुरास विरुद्धच्या सामन्यात खेळला नव्हता. मात्र, आता तो पूर्णपणे सावरला असून सराव सत्रातही त्याने सहभाग नोंदवला आहे. स्कालोनी यांनी सांगितले की, “मेस्सी नक्कीच खेळणार आहे, पण तो किती मिनिटे मैदानात असेल, हे आम्ही सामन्यानंतर किंवा सामन्यापूर्वीच्या सत्रातील त्याच्या हालचालींवरून ठरवू. कोणताही धोका पत्करायचा नाही, हे आमचे ध्येय आहे.”

https://prahaar.in/2026/06/09/hardik-pandya-hardik-pandyas-fitness-report-released-before-the-series-against-afghanistan-suspense-still-on-rohit-sharmas-fitness/

इतर प्रमुख खेळाडूंची प्रकृती सुधारतेय

अर्जेंटिनासाठी दिलासादायक बातमी म्हणजे संघातील इतर जखमी खेळाडूंची प्रकृती वेगाने सुधारत आहे:

• निको पाझ, नाहुएल मोलिना आणि गोंझालो मॉन्टिएल: हे तिन्ही खेळाडू पूर्णपणे फिट असून निवडीसाठी उपलब्ध आहेत.

• ज्युलियन अल्वारेझ: घोट्याच्या त्रासातून तो सावरत आहे.

• लिआंद्रो परेडेस: तो देखील लवकरच मुख्य संघासोबत सरावात सामील होईल.

• एमिलियानो मार्टिनेझ: गोलकीपर मार्टिनेझ दुखापतीतून सावरत असून लवकरच पूर्ण फिट होईल अशी आशा आहे.

https://prahaar.in/2026/06/09/fifa-world-cup-2026-practice-match/

लिओनार्डो बालेर्डीची जागा रिक्त

पोटरीच्या दुखापतीमुळे बचावपटू लिओनार्डो बालेर्डी विश्वचषकातून बाहेर पडला आहे. त्याच्या जागी कोणाची निवड करायची, यावर अद्याप अंतिम निर्णय झालेला नाही. “उद्याच्या सामन्यानंतर आणि इतर खेळाडूंच्या फिटनेसचा आढावा घेऊन आम्ही बदली खेळाडूबाबत निर्णय घेऊ,” असे स्कालोनी यांनी स्पष्ट केले.

विश्वचषक मोहीम

अर्जेंटिना आपल्या विश्वचषक मोहिमेची सुरुवात १६ जून रोजी अल्जेरियाविरुद्ध करणार आहे. त्यानंतर त्यांचा सामना ऑस्ट्रिया (२२ जून) आणि जॉर्डन (२७ जून) यांच्याशी होणार आहे.