काँग्रेस प्रदेशाध्यक्ष हर्षवर्धन सपकाळ यांची घोषणा; दोन दिवसांत जागावाटप अंतिम करणार

मुंबई : राज्यातील स्थानिक स्वराज्य संस्थांमधून विधान परिषदेवर निवडून द्यायच्या १६ जागा आणि नागपूरमधील एका जागेची पोटनिवडणूक अशा सर्व १७ जागांवर महाविकास आघाडी एकत्रितपणे निवडणूक लढवणार आहे. या निवडणुकीच्या जागावाटपाची प्राथमिक चर्चा मुंबईतील काँग्रेसचे मुख्यालय असलेल्या ‘टिळक भवन’ येथे पार पडली. येत्या दोन दिवसांत पुन्हा बैठक घेऊन सर्वसंमतीने अंतिम जागावाटप जाहीर केले जाईल, अशी माहिती काँग्रेसचे प्रदेशाध्यक्ष हर्षवर्धन सपकाळ यांनी बुधवारी दिली.

https://prahaar.in/2026/05/27/review-of-51-thousand-schemes-of-jal-jeevan-mission-priority-will-be-given-to-river-linking-project/

या बैठकीला काँग्रेस प्रदेशाध्यक्ष हर्षवर्धन सपकाळ, राष्ट्रवादी काँग्रेसचे (शरदचंद्र पवार) प्रदेशाध्यक्ष शशिकांत शिंदे, खासदार सुप्रिया सुळे, तसेच उबठाचे आमदार अनिल परब, अंबादास दानवे आणि मिलिंद नार्वेकर उपस्थित होते. या बैठकीत विधान परिषद निवडणुकीच्या रणनीतीसह इतर महत्त्वाच्या राजकीय विषयांवर सविस्तर चर्चा करण्यात आली.प्राथमिक चर्चेनुसार, महाविकास आघाडीतील १७ जागांपैकी काँग्रेस सात ते आठ जागांवर निवडणूक लढवण्याची शक्यता आहे. तर उबाठा गट पाच ते सहा आणि शरद पवारांची राष्ट्रवादी काँग्रेस तीन ते चार जागांवर आपले उमेदवार उभे करणार असल्याची माहिती समोर आली आहे. कोणत्या पक्षाला कोणती जागा सुटणार, याचा अंतिम निर्णय २९ तारखेला होणाऱ्या मविआ नेत्यांच्या पुढील बैठकीत स्पष्ट होणार आहे.