पुणे : पुण्यातून एक संतापजनक आणि धक्कादायक घटना समोर आली आहे. प्रेमात आंधळा झालेल्या एका माथेफिरू तरुणाने तरुणी आणि तिच्या मित्रावर अॅसिडसदृश रासायनिक पदार्थ फेकून जीवघेणा हल्ला केल्याची घटना उघडकीस आली आहे. या घटनेमुळे पुणे शहरात एकच खळबळ उडाली असून पोलिसांनी आरोपीला कर्नाटकातून अटक केली आहे.

पोलिसांनी दिलेल्या माहितीनुसार, पीडित २१ वर्षीय तरुणी आणि तिचा मित्र हे दोघे पुण्यातील एका हॉटेलमध्ये काम करतात. बुधवारी पहाटे काम आटोपल्यानंतर दोघेही ताडीवाला रोड परिसरातील आपल्या राहत्या घराकडे निघाले होते. त्याच वेळी आरोपी श्रीराम मधु सरुन हा त्यांच्या हालचालींवर लक्ष ठेवून दबा धरून बसला होता.

https://prahaar.in/2026/05/22/last-conversation-with-mother-before-entering-the-sea-pune-youth-dies-tragically-in-tarkarli/

पीडित तरुणी ही आरोपीसोबत राहण्यास नकार देत आपल्या मित्रासोबत लिव्ह-इन रिलेशनशिपमध्ये राहत होती. याचाच राग आरोपीच्या मनात होता. दोघांचा रस्ता अडवत आरोपीने तरुणीला, “तू माझ्यासोबत का राहत नाहीस? तू माझी नाहीस तर मी तुला कोणाचीच होऊ देणार नाही,” अशी धमकी दिली.

काही समजण्याच्या आतच आरोपीने स्वतःसोबत आणलेल्या प्लास्टिकच्या ड्रममधील अॅसिडसारखा तीव्र ज्वलनशील रासायनिक पदार्थ थेट तरुणीच्या अंगावर फेकला. या हल्ल्यात तरुणीची मान, पाठ आणि दोन्ही पाय गंभीर भाजले गेले आहे. तरुणी वेदनेत असताना आरोपीने तिच्या मित्रावरही तोच रासायनिक पदार्थ फेकला. या हल्ल्यात त्याच्या पायाला गंभीर दुखापत झाली.

https://prahaar.in/2026/05/22/bandu-andekars-network-active-despite-being-in-jail-a-big-challenge-for-pune-police/

हल्ल्यानंतर आरोपीने अंधाराचा फायदा घेत घटनास्थळावरून पळ काढला. जखमी अवस्थेत असलेल्या तरुणीने बंडगार्डन पोलीस ठाण्यात तक्रार दाखल केली. ही धक्कादायक घटना २० मे रोजी रात्री २ वाजण्याच्या सुमारास पुण्यातील ताडीवाला रोड परिसरात घडली.

शहराच्या मध्यवस्तीत भररात्री झालेल्या या अॅसिड हल्ल्याची माहिती मिळताच पुणे पोलीस दलात मोठी खळबळ उडाली. गुन्हे शाखेच्या पथकांनी तातडीने आरोपीचा शोध सुरू केला. तपासादरम्यान आरोपी कर्नाटकमध्ये पळून गेल्याची माहिती पोलिसांना मिळाली. त्यानंतर पोलिसांनी थेट कर्नाटक गाठत आरोपी श्रीराम मधु सरुन (वय २०) याला बेड्या ठोकल्या. सध्या पोलिसांकडून पुढील तपास सुरू आहे.