अयोध्या : रणबीर कपूर (Ranbir Kapoor) सध्या त्याच्या बहुचर्चित रामायण (Ramayana) चित्रपटामुळे चर्चेत आहे. या चित्रपटात तो प्रभू श्रीरामांची भूमिका साकारत असून, चित्रपटाच्या प्रदर्शनाची चाहते उत्सुकतेने वाट पाहत आहेत. हनुमान जयंतीच्या निमित्ताने निर्मात्यांनी चित्रपटातील रणबीर कपूरच्या प्रभू श्रीरामांच्या भूमिकेची खास झलक प्रदर्शित केली होती. या झलकनंतर चित्रपटाबद्दलची उत्सुकता आणखी वाढली आहे. मात्र, आता रणबीर कपूर एका वेगळ्याच कारणामुळे चर्चेत आला आहे. चित्रपट रिलीज होण्याआधीच त्याने अयोध्येत मोठी गुंतवणूक करत तब्बल ३.३१ कोटी रुपयांची प्रॉपर्टी खरेदी केली आहे.

https://prahaar.in/2026/05/16/gold-price-today-16-may-2026-latest-news-updates/

मिळालेल्या माहितीनुसार, रणबीर कपूरने अयोध्येत सुमारे २,१३४ स्क्वेअर फूट जागा खरेदी केली आहे. ही प्रॉपर्टी राम मंदिरापासून अवघ्या २० मिनिटांच्या अंतरावर असलेल्या सरयू नदीकिनारी विकसित होत असलेल्या एका प्रीमियम प्रोजेक्टमध्ये असल्याचं सांगितलं जात आहे. या प्रोजेक्टमध्ये आलिशान घरं, आधुनिक क्लब हाऊस, लक्झरी सुविधा आणि नामांकित हॉटेल ब्रँडच्या सेवा देखील उपलब्ध असणार आहेत. त्यामुळे या प्रकल्पाकडे गुंतवणूकदार आणि सेलिब्रिटींचं विशेष लक्ष लागलं आहे.

या प्रॉपर्टी खरेदीबाबत बोलताना रणबीर कपूरने अयोध्येबद्दलच्या आपल्या खास भावना व्यक्त केल्या. तो म्हणाला, “माझा असा विश्वास आहे की अयोध्येनेच माझी निवड केली आणि मी फक्त त्या हाकेला प्रतिसाद दिला. अयोध्या ही आपल्या इतिहासात आणि संस्कृतीत खोलवर रुजलेली भूमी आहे. सरयूच्या या पवित्र भूमीने माझ्यासाठी एक माध्यम म्हणून काम केलं असून, त्यामुळे ही जागा माझ्या कुटुंबाशी कायमची जोडली जाईल.”

रणबीर कपूरच्या या निर्णयाची सध्या सोशल मीडियावर मोठी चर्चा सुरू आहे. ‘रामायण’ चित्रपटात प्रभू श्रीरामांची भूमिका साकारत असतानाच अयोध्येत प्रॉपर्टी खरेदी केल्यामुळे अनेक चाहत्यांनी त्याच्या या निर्णयाचं स्वागत केलं आहे.