होर्मुझच्या सामुद्रधुनीमध्ये अमेरिका आणि इराण यांच्यात झालेल्या ताज्या संघर्षात एका भारतीय मालवाहू जहाजावर गोळीबार झाला. या घटनेत एका भारतीय खलाशाचा मृत्यू झाला, तर इतर १७ खलाशांना वाचवण्यात यश आले. मिळालेल्या माहितीनुसार, हा खलाशी गुजरातच्या द्वारका जिल्ह्यातील जाम सलाया गावचा रहिवासी होता आणि तो दुबईहून येमेनला माल घेऊन जात होता.

मृत खलाशाची ओळख अल्ताफ तलाब केर अशी पटली आहे. ‘अल फैज नूर सोलेमानी’ या जहाजावर १८ खलाशी असताना गोळीबार झाला, त्यात केर यांचा मृत्यू झाला. दुबईतील भारतीय वाणिज्य दूतावासाने या घटनेची पुष्टी केली असून दुःख व्यक्त केले आहे.

https://prahaar.in/2026/05/09/8th-pay-commission-big-update-for-government-employees-important-meeting-to-be-held-in-delhi-discussion-on-these-demands-including-salary-hike/

महावाणिज्य दूतावासाने एक्सवर लिहिले, ” या दुर्दैवी घटनेबद्दल आम्हाला तीव्र दुःख झाले आहे. यामध्ये जहाजावरील एका भारतीय कर्मचाऱ्याचा दुःखद मृत्यू झाला आहे. वाणिज्य दूतावास जहाजाच्या मालकाच्या संपर्कात आहे आणि अधिक माहिती गोळा करत आहे. या प्रकरणात वाणिज्य दूतावास प्राधान्याने सर्वतोपरी मदत करेल.”

इंडियन सेलिंग व्हेसल्स असोसिएशनचे सरचिटणीस, आदम भाया यांनी सांगितले की, जहाज होर्मुझच्या सामुद्रधुनीतून जात असताना ही घटना घडली. हल्ल्याच्या वेळी अल्ताफ केर जहाजाच्या इंजिन रूमजवळ होते. जहाजाचे मोठे नुकसान झाले आणि ते बुडू लागले. भाया यांनी सांगितले की, ‘प्रेम सागर’ नावाचे दुसरे जहाज घटनास्थळी पोहोचले आणि त्यांनी उर्वरित १७ कर्मचाऱ्यांची सुटका केली. सर्वांना दुबईला आणण्यात आले.

https://prahaar.in/2026/05/09/major-action-against-encroachment-in-nashik-city/

भाया यांनी दुबईतील भारतीय वाणिज्य दूतावासाला एक पत्र लिहिले आहे. या पत्रात म्हटले आहे की, या घटनेमुळे खलाशी समुदाय आणि मृतांच्या कुटुंबीयांमध्ये प्रचंड भीती आणि दुःख पसरले आहे. त्यांनी पुढे असेही सांगितले की, अशा परिस्थितीत एका निष्पाप भारतीय खलाशाचा मृत्यू होणे ही अत्यंत दुःखद घटना असून, याकडे संबंधित अधिकाऱ्यांनी तातडीने लक्ष देण्याची गरज आहे.