वर्धा : आनंद, उत्साह आणि जल्लोषात सुरू असलेला लग्नसोहळा क्षणात शोकांतिकेत बदलल्याची धक्कादायक घटना वर्धा जिल्ह्यात घडली आहे. बँडच्या तालावर नाचत पुढे सरकणारी वरात, मंदिरात दर्शनासाठी थांबलेले वर्‍हाडी आणि त्याच वेळी झालेला अचानक चाकूहल्ला.या सर्वांनी उपस्थितांना हादरवून सोडले. संपत्तीच्या वादातून अल्पवयीन पुतण्याने स्वतःच्या काकावर आणि चुलत भावावर जीवघेणा हल्ला केल्याचे निष्पन्न झाले आहे.

मंदिराजवळ हल्ल्याची थरारक घटना

ही घटना वर्ध्यातील महिला आश्रमसमोरील हनुमान मंदिराजवळ घडली. वरात मंदिरात दर्शनासाठी थांबली असताना आरोपीने अचानक चाकू काढून प्रभाकर भलमे आणि नितीन भलमे यांच्यावर सपासप वार केले. हल्ला इतका तीव्र होता की दोघेही गंभीर जखमी झाले. तत्काळ त्यांना सेवाग्राम रुग्णालयात हलवण्यात आले, मात्र उपचारांपूर्वीच डॉक्टरांनी त्यांना मृत घोषित केले.

पोलीस तपास

पोलीस तपासात समोर आलेल्या माहितीनुसार, बरबडी येथील भलमे कुटुंबात संपत्तीच्या कारणावरून दीर्घकाळ वाद सुरू होता. सुमारे आठ महिन्यांपूर्वीही आरोपी आणि मृतकांमध्ये वाद झाला होता. त्यानंतर आरोपीच्या मनात बदल्याची भावना निर्माण झाली होती. विशेष म्हणजे, हल्ल्यासाठी त्याने आधीच ऑनलाईन चाकू मागवून ठेवला होता, यावरून हल्ला पूर्वनियोजित असल्याचे स्पष्ट होत आहे.

आनंदावर विरजण, परिसरात खळबळ

लग्नाच्या जल्लोषात अचानक घडलेल्या या घटनेने संपूर्ण परिसरात भीती आणि खळबळ पसरली आहे. वर्‍हाड्यांमध्ये एकच गोंधळ उडाला, तर कुटुंबीयांवर दुःखाचा डोंगर कोसळला. आनंदाचा क्षण काही सेकंदांत दुःखद आठवणीत बदलला.

पोलिसांची कारवाई सुरू

घटनेची माहिती मिळताच पोलिसांनी तात्काळ घटनास्थळी धाव घेत आरोपी अल्पवयीन पुतण्याला ताब्यात घेतले आहे. या प्रकरणाचा पुढील तपास सुरू असून, हल्ल्यामागील नेमके कारण आणि इतर बाबींची चौकशी केली जात आहे.

कौटुंबिक वाद किती टोकाला जाऊ शकतो, याचे हे एक उदाहरण आहे, किरकोळ वादातून सुरू झालेला संघर्ष थेट हत्येपर्यंत पोहोचल्याने परिसरात खळबळ उडाली आहे.