जळगाव / एरंडोल – येथील लांडापूर भागातील चार वर्षीय बालिकेवर तिच्याच नातेवाईक असलेल्या ५९ वर्षीय मामे आजोबांनी अत्याचार केल्याची घटना समोर आली आहे. यानंतर संतप्त जमावाने संशयिताविरुद्ध कडक कारवाईच्या मागणीसाठी राष्ट्रीय महामार्गावर रास्तारोको आंदोलन केले.

अमळनेर विभागाचे उपविभागीय पोलीस अधिकारी विनायक कोते, आदिवासी नेत्या प्रतिभा शिंदे यांच्यासह एरंडोलचे पोलीस निरीक्षक निलेश गायकवाड, पारोळ्याचे निरीक्षक अशोक पवार, धरणगावचे निरीक्षक सुनील पवार, कासोद्याचे सहाय्यक निरीक्षक श्रीकांत पाटील यांनी संतप्त जमावाची समजूत काढली. संशयितास अटक करण्यात आली असून त्याच्याविरुद्ध कडक कारवाई करण्याचे आश्वासन दिल्यानंतर आंदोलन मागे घेण्यात आले.

याबाबत माहिती अशी की, शहरातील लांडापूर भागात राहणारी चार वर्षीय बालिका दुपारी बारा वाजेच्या सुमारास आपल्या घरात आई व भावंडांसह खेळत होती. बालिकेची आई प्रातर्विधीसाठी गेल्यानंतर सुमारे पंधरा मिनिटांनी घरी परतली असता बालिका घरात आढळून आली नाही. त्यामुळे तिने मुलांसह आजूबाजूला चौकशी केली.

घराशेजारीच राहणारे बालिकेचे नात्याने मामे आजोबा असलेल्या नातेवाईकाकडे बालिकेची आई चौकशीसाठी गेली असता घराचा दरवाजा अर्धवट लावलेला दिसून आला. तिने त्यांच्याकडे बालिकेबाबत विचारणा केली असता त्यांनी मला माहिती नाही असे सांगितले. मात्र ते अर्धनग्न अवस्थेत दिसल्याने आईला संशय आला. तिथे तिची चार वर्षीय बालिका आढळून आली.

आईने बालिकेला घरी आणले आणि घडलेल्या घटनेची माहिती पतीला दिली. याबाबत बालिकेच्या आईने दिलेल्या तक्रारीवरून संशयिताविरुद्ध पोक्सो (POCSO ACT) कायद्यांतर्गत गुन्हा दाखल करण्यात आला असून पोलिसांनी त्याला अटक केली आहे. सहाय्यक निरीक्षक शंकर पवार पुढील तपास करत आहेत. दरम्यान, चार वर्षीय बालिकेवर अत्याचार झाल्याची घटना समजताच संशयिताविरुद्ध कडक कारवाई करण्यात यावी, तसेच त्याला आमच्या ताब्यात द्यावे, अशी मागणी करत शेकडो महिला व पुरुषांनी पोलीस स्थानक परिसरात गर्दी केली. तसेच राष्ट्रीय महामार्गावरील कासोदा फाट्याजवळ रास्तारोको आंदोलन सुरू केले. उपविभागीय पोलीस अधिकारी विनायक कोते, पोलीस निरीक्षक निलेश गायकवाड यांच्यासह हवालदार अनिल पाटील, आकाश शिंपी, पोपट सोनार, सचिन पाटील, दीपक पाटील आणि इतर पोलीस कर्मचाऱ्यांनी आंदोलनस्थळी धाव घेऊन संतप्त जमावाची समजूत काढली व विस्कळीत झालेली वाहतूक पूर्ववत केली. परिसरात शीघ्र कृती दलाच्या दोन तुकड्या तसेच पोलीस बंदोबस्त वाढवण्यात आला आहे.