पाकिस्तानी खेळाडूंची आंतरराष्ट्रीय स्तरावर नाचक्की झाली आहे. खेळाडूंच्या हॉटेलचं बिल न भरल्याने खेळाडूंना बराच वेळ रस्त्यावर बसून राहावे लागले आहे.

मिळालेल्या माहितीनुसार, पाकिस्तानी हॉकी टीम ऑस्ट्रेलियाची राजधानी कॅनबेरा येथे आपल्या स्पर्धेसाठी गेले असताना ते ज्या हॉटेलमध्ये थांबणार होते त्या हॉटेलचं पाकिस्तान हॉकी फेडरेशनने बिल न भरल्यामुळे त्यांना तिथे प्रवेश नाकारण्यात आला.

होबार्ट येथे होणाऱ्या एफआयएच प्रो लीग स्पर्धेच्या दुसऱ्या टप्प्यासाठी पाकिस्तानी हॉकी संघ ऑस्ट्रेलियात आहे. पाकिस्तान संघाला प्रो लीगमध्ये आतापर्यंत खेळलेल्या सर्व म्हणजेच सहा मॅचमध्ये हार पत्करावी लागली आहे.

वृत्तानुसार, संघाला सांगण्यात आले की त्यांनी खेळाडू आणि व्यवस्थापन कर्मचाऱ्यांसाठी कॅनबेरा येथील एका चार स्टार हॉटेलमध्ये खोल्या बुक केल्या आहेत आणि बिले भरण्यात आली आहेत. परंतु जेव्हा संघ आला तेव्हा त्यांना कळले की हॉटेलचं बिल भरलेलंच नाही, त्यामुळे त्यांचं बुकिंग रद्द झालं आहे. वेळेच्या फरकामुळे संघाचे प्रशिक्षक ताहिर जमान हॉकी फेडरेशनच्या अधिकाऱ्यांशी संपर्क साधू शकले नाहीत.

काही तासांनंतर, हॉटेल कर्मचाऱ्यांनी अखेर थकलेल्या खेळाडूंना काही खोल्या दिल्या. फक्त काही खोल्या असल्याने, संघाला त्यानुसार खोल्या विभागून घ्याव्या लागल्या. दुसऱ्या दिवशी, पाकिस्तान संघाने पुन्हा संघ ऑस्ट्रेलियाविरुद्धचा सामना २-३ ने गमावला.

काही स्थानिक पाकिस्तानी नागरिकांशी संपर्क साधल्यानंतर आणि त्यांनी आर्थिक मदत करण्यासाठी पुढे आल्यानंतर हॉकी संघाला अखेर हॉटेलचे बिल भरता आले, असे वृत्त आहे.

आर्थिक कारणांमुळे संघाला फटका बसण्याची ही पहिलीच वेळ नाही. अहवालानुसार, अर्जेंटिनामध्ये झालेल्या FIH प्रो लीगच्या पहिल्या टप्प्यात, कथित ‘निधीअभावी’ खेळाडूंना त्यांचे दैनिक भत्तेही देण्यात आले नव्हते.