नवी दिल्ली: अमेरिका आणि भारत यांच्यातील वाढत्या व्यापार तणावादरम्यान एक खळबळजनक दावा समोर आला आहे. जर्मन वृत्तपत्र ‘फ्रँकफर्टर ऑलगेमाइनने आपल्या अहवालात म्हटले आहे की, अमेरिकेचे राष्ट्राध्यक्ष डोनाल्ड ट्रम्प यांनी पंतप्रधान नरेंद्र मोदी यांना गेल्या काही आठवड्यांत चार वेळा फोन करण्याचा प्रयत्न केला, मात्र मोदींनी त्यांचे फोन घेतले नाहीत. दरम्यान, सरकारी सूत्रांनी हे दावे फेटाळून लावले आहेत.

व्यापार वादाची पार्श्वभूमी

सध्या भारत आणि अमेरिका यांच्यात व्यापार शुल्कावरून मोठा वाद सुरू आहे. अमेरिकेने भारतावर ५०% पर्यंत आयात शुल्क लावले आहे, ज्यात २५% व्यापार असमतोलासाठी आणि अतिरिक्त २५% रशियन तेलाच्या खरेदीसाठी आहे. या वाढलेल्या तणावाच्या काळात ट्रम्प यांनी थेट मोदींशी बोलण्याचा प्रयत्न केला, मात्र मोदींनी त्याला प्रतिसाद दिला नाही, असा दावा जर्मन वृत्तपत्राने केला आहे.

मोदींच्या नाराजीचे संकेत

FAZ च्या अहवालानुसार, ट्रम्प यांच्या व्यापार धोरणांमुळे आणि त्यांनी भारताच्या अर्थव्यवस्थेवर केलेल्या नकारात्मक टिप्पणीमुळे मोदी नाराज आहेत. ट्रम्प यांनी जुलैमध्ये भारताला “मृत अर्थव्यवस्था” म्हटले होते आणि रशियासोबतच्या व्यापारावरही टीका केली होती. यावर मोदींनी १० ऑगस्ट रोजी अप्रत्यक्षपणे उत्तर देत भारताची अर्थव्यवस्था जगातील शीर्ष तीन अर्थव्यवस्थांमध्ये स्थान मिळवण्यासाठी प्रगती करत असल्याचे म्हटले होते.

“जाळ्यात अडकण्यास मोदींचा नकार”

जर्मन वृत्तपत्राने म्हटले आहे की, मोदींचा हा निर्णय त्यांच्या नाराजी आणि सावधगिरीचे प्रतीक आहे. ट्रम्प यांनी यापूर्वी व्हिएतनामसोबत केलेल्या एका व्यवहाराचा संदर्भ देत, मोदींना त्यांच्या राजकारणाच्या जाळ्यात अडकायचे नाही, असे अहवालात म्हटले आहे. त्यावेळी, केवळ एका फोन कॉलवर चर्चा करून ट्रम्प यांनी सोशल मीडियावर व्यापार कराराची घोषणा केली होती, जो प्रत्यक्षात झालाच नव्हता.

या घटनेतून असे संकेत मिळत आहेत की, भारत अमेरिकेच्या दबावाखाली झुकण्यास तयार नाही आणि आपल्या राष्ट्रीय हितांना प्राधान्य देत आहे. रशिया आणि चीनसोबतचे भारताचे संबंध मजबूत करण्याचा प्रयत्नही यामागचे एक कारण असू शकते. या दाव्यावर भारत किंवा अमेरिकेकडून अद्याप कोणतीही अधिकृत प्रतिक्रिया आलेली नाही.