मुंबई : आजकाल अनेक तरुणांना सुडौल आणि मजबूत शरीर (muscle building) बनवण्याची आवड आहे. यासाठी ते जिममध्ये तासनतास व्यायाम करतात. मात्र, चांगल्या शरीरासाठी फक्त व्यायाम पुरेसा नाही, तर आहाराची (diet) भूमिका खूप महत्त्वाची असते. जर तुम्ही तुमच्या आहारात काही चुकीच्या गोष्टी खात असाल, तर तुमच्या मेहनतीवर पाणी फिरू शकते. त्यामुळे, स्नायू (muscles) वाढवण्यासाठी कोणत्या गोष्टी टाळाव्यात, ते जाणून घेऊया.

१. तळलेले आणि जंक फूड 

समोसे, भजी, वडापाव, फ्रेंच फ्राइज आणि पिझ्झा-बर्गरसारखे पदार्थ चविष्ट असले तरी ते तुमच्या आरोग्यासाठी आणि मसल बिल्डिंगसाठी अत्यंत हानिकारक आहेत. या पदार्थांमध्ये ‘ट्रान्स फॅट‘ (Trans Fat) आणि जास्त प्रमाणात कॅलरी (Calories) असतात. हे फॅट तुमच्या शरीरात जमा होतात, ज्यामुळे चरबी वाढते आणि स्नायूंच्या वाढीस अडथळा येतो.

२. गोड पेये आणि साखरेचे पदार्थ:

कोल्ड्रिंक्स, सोडा, ज्यूस आणि एनर्जी ड्रिंक्समध्ये मोठ्या प्रमाणात साखर आणि फ्रुक्टोज कॉर्न सिरप (Fructose Corn Syrup) असते. यामुळे शरीरातील इन्सुलिनची पातळी वाढते, ज्यामुळे वजन वाढते आणि स्नायूंच्या वाढीसाठी आवश्यक पोषक तत्वे शोषली जात नाहीत. गोड पदार्थ खाल्ल्याने लवकर भूक लागते.

३. अति प्रमाणात प्रक्रिया केलेले मांस

सॉसेज (Sausage), हॉट डॉग्स (Hot Dogs), हॅम (Ham) आणि बेकन (Bacon) यांसारख्या प्रक्रिया केलेल्या मांसामध्ये सोडियम (Sodium), नायट्रेट्स (Nitrates) आणि प्रिझर्वेटिव्ह (Preservatives) जास्त असतात. हे पदार्थ स्नायूंच्या आरोग्यासाठी चांगले नाहीत. त्याऐवजी तुम्ही चिकन, मासे किंवा अंडी यांसारख्या नैसर्गिक प्रोटीन स्रोतांचा वापर करू शकता.

४. जास्त मीठ असलेले पदार्थ:

अति प्रमाणात मीठ खाल्ल्याने शरीरात पाण्याचे प्रमाण वाढते (Water Retention), ज्यामुळे शरीर सुजल्यासारखे दिसते. यामुळे तुमचे स्नायू योग्यरित्या ‘कट’ दिसत नाहीत. चिप्स, पॅक केलेले स्नॅक्स आणि काही सॉसेज यांसारख्या पदार्थांमध्ये मीठ जास्त असते. त्यामुळे, असे पदार्थ खाणे टाळा.

५. जास्त प्रमाणात मद्यपान

दारू प्यायल्याने स्नायू तयार होण्याच्या प्रक्रियेला बाधा येते. दारू शरीरातील प्रोटीन संश्लेषण कमी करते, जे स्नायूंच्या वाढीसाठी खूप महत्त्वाचे आहे. जास्त प्रमाणात दारू प्यायल्याmने टेस्टोस्टेरॉनची पातळी कमी होते आणि कोर्टिसोलची पातळी वाढते, ज्यामुळे स्नायू तुटायला लागतात.

या पाच गोष्टी टाळून तुम्ही तुमच्या शरीराला योग्य पोषण देऊ शकता आणि तुमचे बॉडीबिल्डिंगचे ध्येय सहज गाठू शकता. नियमित व्यायाम आणि योग्य आहार यांचा समन्वय साधणे महत्त्वाचे आहे.