खर्डीतील ललित कंपनीत वेठबिगारी करणा-या ११ मजुरांच्या मुक्तीसाठी श्रमजीवी संघटनेच्या शेकडो कार्यकर्त्यांनी तब्बल सात तास ठिय्या आंदोलन पुकारले.
खर्डीजवळील ललित कंपनीचे मालक सलिम शेठ, व्यवस्थापक कोलते, मॅथ्यू, अनिरुद्ध सिंग सोमा आवटे यांनी गेल्या नऊ महिन्यांपासून वेठबिगारांना कोंडून १० ते १२ तास राबवून घेतले होते. दगड फोडीसाठी ते शिविगाळ करत. राजूचा भाऊ विठ्ठललाही मारहाण झाल्याने तो आजारी पडला. मजुरीचे पैसे वारंवार मागूनही ते दिले नाहीत. मजुरीचे पैसे वारंवार मागण्याच्या तगाद्याने राजू व त्याची पत्नी रुक्मिणीला नवी मुंबई येथील बेलापूर येथे बोलवून मारहाण केली. नऊ महिन्यांची मजुरी न मिळाल्याने राजू हुलगुंडेची मुलगी राधा हिचा विवाहही मोडला. या प्रकरणी शुक्रवारी श्रमजीवी संघटनेचे सरचिटणीस बाळाराम भोईर, स्नेहा दुबे-पंडित, प्रकाश खोडका, जिल्हा परिषद सदस्या संगीता भोये यांनी शहापूर तहसील कार्यालयासमोर ठिय्या आंदोलन केले. श्रमजीवी संघटनेच्या आक्रमक पावित्र्यानंतर शहापूर तहसीलदार सुनिल भुताळे यांनी राजू हुलगुंडे व इतर वेठबिगारांना मुक्त केले.
