नेरळ पूर्व भागातील रेल्वे लाईनच्या बाजूने येणारी जलवाहिनी इमारत बांधण्यासाठी खड्डा खोदताना तोडल्याने या भागातील नागरिकांना मागील ८ दिवसांपासून पाण्यापासून वंचित राहावे लागत आहे.
गंगानगर भागात एका बिल्डरने इमारत बांधण्यासाठी जेसीबी मशीनच्या सहाय्याने मोठे खड्डे खोदले. त्यावेळी तेथून जाणारी पिण्याच्या पाण्याची जलवाहिनी फुटली. मात्र ती दुरुस्त न करता त्यावर मातीचा ढिगारा टाकण्यात आल्याने राठोड आळी, झोपडपट्टी, साईकृपा सोसायटी आणि निर्माणनगरीच्या काही भागात मागील ८ दिवसांपासून पाणी आलेले नाही.
यानंतर नागरिक संतप्त झाल्याने नेरळ ग्रामपंचायतीच्या पाणीपुरवठा विभागाने २ दिवसांपासून जलवाहिनी दुरुस्तीचे काम हाती घेतले आहे. मात्र तरीही अजून काही भागांत पाणी आलेले नाही. त्यामुळे नागरिकांच्या संतापात भर पडली आहे.
