कल्याण: गेल्या काही दिवसांपासून कल्याणमध्ये (kalyan) गुन्हेगारीच्या (crime) घटना काही कमी होत नाही आहेत. काही दिवसांपूर्वीच एका अल्पवयीन मुलीच्या हत्येने कल्याण हादरले होते. या घटनेला थोडेच दिवस होत नाहीत तर आणखी एक धक्कादायक घटना कल्याणमध्ये उघडकीस आली आहे.
कल्याणमधील एका शाळेत ५ वर्षीय मुलावर लैंगिक अत्याचार केल्याचा धक्कादायक प्रकार घडला आहे. हे कृत्य त्या शाळेतील डान्स टीचरने केले असून या प्रकरणात आरोपी टीचरला कोळशेवाडी पोलिसांनी अटक केली आहे.
कल्याण पूर्व येथील एका शाळेत शिकत असलेल्या ५ वर्षीय मुलाने जेव्हा लैंगिक अत्याचाराची घटना आपल्या आई-वडिलांना सांगितली तेव्हा त्यांना मोठा धक्का बसला. ही घटना शुक्रवारी घडली होती. या डान्स टीचरने मुलासोबत शाळेतील शौचालयात लैंगिक अत्याचार करण्याचा प्रयत्न केला होता.
शनिवारी आणि रविवारी शाळा बंद असल्याने पीडित मुलाचे आईवडील सोमवारी शाळेत गेले आणि घडलेला संपूर्ण प्रकार त्यांनी सांगितला. त्यानंतर तातडीने कोळशेवाडी पोलीस ठाण्यात या प्रकरणी गुन्हा दाखल केला. गुन्हा दाखल केल्यानंतर पोलिसांनी आरोपी डान्स टीचरला अटक केली. या प्रकरणी पोलीस पुढील तपास करत आहे.
दरम्यान, कल्याणमध्ये वाढत्या गुन्हेगारीला आळा घालण्याचे मोठे आव्हान कल्याण पोलिसांसमोर आहे.