नवी दिल्ली : श्रीलंका, पाकिस्तानसारखे छोटे-छोटे देश आर्थिक संकटात सापडलेले असताना आता जगात सर्वाधिक शक्तिशाली असणाऱ्या अमेरिकेलाही आर्थिक संकटाचा सामना करावा लागत आहे. अमेरिकेत महागाई ४० वर्षांमधील सर्वाधिक उच्चांकी पातळीवर पोहोचली आहे. त्यामुळे याचा परिणाम इतर देशांसह भारतावरही होणार आहे.
अमेरिकेतील महागाईचा दर ९.१ टक्के आहे. भारतीय बाजाराच्या दृष्टीने हा दर दोन टक्क्यांहून अधिक आहे. डॉलरच्या उलाढालीचा परिणाम जगातील देशांच्या अर्थव्यवस्थेवर होतो. यामुळेच अमेरिकेतील महागाईच्या संकटामुळे आगामी काळात भारतीय अर्थव्यवस्थेसमोरचे संकटही वाढण्याची चिन्ह आहेत.
महागाई वाढल्याने अमेरिकेच्या बँकीग क्षेत्रात अर्थात फेडरल रिजर्व्हच्या दरांमध्ये तीव्र वाढ होण्याची शक्यता आहे. यामुळे गुंतवणूकदार बाजारातून पैसे काढण्यास सुरुवात करतील. गुंतवणूकदार बाहेर पडल्याने रुपया आणखी घसरण्याची शक्यता आहे. यामुळे आयातही अधिक महाग होऊ शकते. शिवाय अमेरिकन उत्पादनांच्या किंमती देखील वाढतील.