त्र्यंबकेश्वर :प्रसिद्ध ज्योतिर्लिंग त्र्यंबकेश्वर मंदिराच्या गर्भगृह प्रवेशासाठी न्यायालयाचा दरवाजा ठोठावण्याची वेळ येऊ देऊ नये, असे मत अखिल भारतीय आखाडा परिषदेचे महामंत्री हरीगिरीजी महाराज यांनी त्र्यंबकेश्वर येथे पत्रकारांशी बोलताना व्यक्त केले. मंदिरातील गर्भगृहात जाण्यास श्री त्र्यंबकेश्वर देवस्थान ट्रस्टने मनाई केलेली आहे.
ही बंदी मागे घ्यावी अशी मागणी हरीगिरीजी महाराज यांनी केली आहे. कोविड काळ आणि प्राचीन पिंडीचे रक्षण व्हावे या हेतूने पिंडीजवळ जाण्यास श्री त्र्यंबकेश्वर देवस्थान ट्रस्टने सध्या मनाई केली आहे. सोवळे नेसून पिंडीजवळ जाण्याची पद्धत आहे. पुरोहितांबरोबरच साधूंनाही सध्या गर्भगृहात प्रवेश बंदी करण्यात आलेली आहे. याबाबत स्थानिक साधू महंत यांच्यावतीने देवस्थान ट्रस्टला पत्र देण्यात येईल असे त्यांनी सांगितले.
त्याचप्रमाणे त्र्यंबकेश्वर ते सौराष्ट्र सोमनाथ ही ज्योतिर्लिंगांची दोन ठिकाणे रेल्वेने जोडावीत अशी मागणी आखाडा परिषदेच्यावतीने केली आहे. महामंडलेश्वर नगर पिंपळद येथे भेट दिल्यानंतर नील पर्वतावर ते बोलत होते. आगामी २०२७ च्या सिंहस्थ कुंभमेळ्यापुर्वी त्र्यंबकेश्वर रेल्वेने जोडावे अशी मागणी वाढत आहे.