सर्वाधिक पदकांच्या यादीत भारत सहाव्या क्रमांकावर
हांगझोऊ : आशियाई क्रीडा स्पर्धा २०२३ (Asian Games 2023) मध्ये भारताचे खेळाडू दमदार कामगिरी करत आहेत. आज आशियाई स्पर्धेचा चौथा दिवस असून या एकाच दिवशी भारताने आतापर्यंत सात पदकांची कमाई केली आहे. तर चार दिवसांच्या या सामन्यांत पाच सुवर्णपदके, सात रौप्यपदके आणि दहा कांस्यपदकांसह एकूण २२ पदकांची कमाई करत सर्वाधिक पदकांच्या यादीत भारत सहाव्या क्रमांकावर आला आहे.
सिफ्ट कौर सामरा हिने ५० मीटर रायफल शूटिंगमध्ये सुवर्णपदक पटकावले. २५ मीटर पिस्तूल महिला सांघिकमध्ये मनू भाकेर, एशा सिंग, रिदम सांगवान यांनी सुवर्णपदक पटकावले, तर याच स्पर्धेच्या वैयक्तिक फेरीत ईशा सिंगने रौप्यपदक पटकावले. पुरुष गटात अनंतजीत सिंग नारुका याने रौप्य मिळवले. महिला २५ मीटर रायफल ३ पोझिशन्स टीमच्या आशी चौकसे, मानिनी कौशिक आणि सिफ्ट कौर समरा यांनी रौप्यपदकाची कमाई केली. पुरुष स्कीट टीममध्ये अंगद, गुर्जोत आणि अनंत जीत यांनी कांस्यपदक मिळवले. विष्णू सरवननने सेलिंगमध्ये कांस्यपदक जिंकून तालिकेत भर घातली. अशा एकूण सात पदकांची आज भारताने कमाई केली.
दरम्यान, चीनने ६८ सुवर्णांसह आपले वर्चस्व कायम राखले आहे. चीनने आतापर्यंत १२३ पदकांची कमाई करत सर्वोच्च स्थान गाठले आहे. त्यानंतर कोरियाने ५९ पदकांची कमाई करत दुसरे स्थान मिळवले आहे. जपान ५५ पदकांसह तिसऱ्या स्थानावर आहे तर भारत २२ पदकांसह सहाव्या स्थानावर आहे.
Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra