मुंबई : मुंबईत एकिकडे वर्ल्डकपचा सामना आणि दुसरीकडे छट पुजा सुरू असतानाच कुर्ला परिसरात एका सुटकेसमध्ये महिलेचा मृतदेह (Crime) आढळून आल्याने परिसरात खळबळ माजली आहे.
सीएसटी रोड शांतीनगरच्या समोरिल बाजूला मेट्रो रेल्वेचे काम सुरू आहे. या ठिकाणी एक बेवारस सुटकेस असल्याचा एक फोन रविवारी दुपारी कुर्ला पोलीस ठाण्यात आला. छट पुजा आणि वर्ल्डकप फायनलच्या पार्श्वभूमीवर पोलिसांनी तात्काळ घटनास्थळी तपास केला असता बॅगेत चक्क एका महिलेचा मृतदेह असल्याची धक्कादायक घटना उघडकीस आली. त्यामुळे शहर आणि परिसरात खळबळ उडाली. महिलेचा मृतदेह राजावाडी रूग्णालयात पोस्टमार्टमसाठी पाठवण्यात आला आहे.
दरम्यान या प्रकरणात खुनाची बाब स्पष्ट आहे. तसेच या महिलेचे वय अंदाजे ३५ ते ४०च्या दरम्यान असून तिने टीशर्ट आणि नाईट पॅन्ट घातलेली आहे. तिचा मृतदेह एका सुटकेसमध्ये दुमडलेल्या अवस्थेत होता. मात्र अद्याप या महिलेची ओळख पटलेली नाही. त्याचबरोबर या परिसरामध्ये कोणतीही महिला बेपत्ता असल्याची तक्रार देखील दाखल झाल्याची नोंद नाही. त्यामुळे पोलिसांकडून तिच्या फोटोवरून तिचा तपास केला जात आहे.