Mumbai Update : मुंबईत मलेरियाचा वाढता धोका; 3,177 रुग्णांची नोंद, डेंग्यू-लेप्टोमध्ये मात्र घट

Mumbai : मुंबईत पावसाळ्याच्या पार्श्वभूमीवर साथीच्या आजारांवर नियंत्रण ठेवण्यासाठी महापालिकेने उपाययोजना तीव्र केल्या आहेत. 1 जून ते 15 ऑगस्ट 2026 या कालावधीत मुंबईत मलेरियाचे 3,177 रुग्ण आढळले आहेत. मागील वर्षी याच कालावधीत 2,852 रुग्णांची नोंद झाली होती. म्हणजेच यंदा मलेरियाच्या रुग्णसंख्येत सुमारे 11.4 टक्क्यांनी वाढ झाली आहे.

दुसरीकडे, डेंग्यूच्या रुग्णसंख्येत घट झाली आहे. यंदा 1,079 रुग्ण आढळले, तर मागील वर्षी ही संख्या 1,217 होती. तसेच लेप्टोस्पायरोसिसचे 189 रुग्ण नोंदले गेले असून, मागील वर्षी 322 रुग्ण होते. त्यामुळे डेंग्यू आणि लेप्टोच्या तुलनेत यंदा घट दिसत असली, तरी पावसाळ्यात साचलेले पाणी आणि डासांची उत्पत्ती यामुळे नागरिकांनी खबरदारी घेण्याचे आवाहन करण्यात आले आहे. दरम्यान, 1 ते 15 ऑगस्टदरम्यान BMC ने 5 लाख 63 हजार 382 घरांचे सर्वेक्षण केले. या मोहिमेत 26 लाख 85 हजार 828 नागरिकांची तपासणी करण्यात आली असून, 32 हजार 158 रक्तनमुने संकलित करण्यात आले. लेप्टोस्पायरोसिसपासून बचावासाठी 24 आरोग्य शिबिरांचे आयोजन करण्यात आले आणि 10,542 नागरिकांना प्रतिबंधात्मक उपचार देण्यात आले. डासांची उत्पत्ती रोखण्यासाठीही महापालिकेने मोठ्या प्रमाणावर कारवाई केली आहे. छतांवर आणि परिसरात आढळलेले 674 टायर आणि 25,860 भंगार वस्तू हटवण्यात आल्या आहेत. तसेच 18,568 इमारतींच्या परिसरात आणि 3 लाख 18 हजार 803 झोपड्यांमध्ये धूम्रफवारणी करण्यात आली.

याशिवाय, डेंग्यूच्या प्रसाराला कारणीभूत ठरणाऱ्या Aedes डासांची 11,227 उत्पत्तीस्थाने आढळल्याची माहिती समोर आली आहे. BMC च्या Insecticide Department कडून मलेरिया, डेंग्यू आणि इतर vector-borne diseases च्या नियंत्रणासाठी अळीनाशक उपाय आणि फॉगिंग केले जाते. या आकडेवारीत आणखी एक चिंताजनक बाब समोर आली आहे. H1N1 रुग्णसंख्या 72 वरून 309 वर पोहोचली असून सुमारे 329.2 टक्क्यांची वाढ झाली आहे. त्यामुळे मुंबईकरांनी पावसाळ्यात ताप, अंगदुखी, थंडी वाजणे किंवा इतर लक्षणे जाणवल्यास दुर्लक्ष न करता वैद्यकीय सल्ला घेण्याचे आवाहन करण्यात आले आहे.