मुंबई : क्रिकेट विश्वात काही खेळाडूंच्या वैयक्तिक जीवनाची चर्चा त्यांच्या खेळातील विक्रमांपेक्षाही अधिक झाली. त्यातलंच एक नाव म्हणजे 'विनोद कांबळी'. क्रिकेटच्या मैदानावर दमदार सुरुवात केल्यानंतर त्याच्या कारकिर्दीला वेगळीच वळणं मिळाली. विनोद कांबळीचा हाच प्रवास आता ओटीटीच्या माध्यमातून आपल्या भेटीला येत आहे. विनोद कांबळीच्या आयुष्यावर आधारित असलेल्या या वेब सीरिजचं नाव ‘कांबळी’ असं असणार आहे. दिग्दर्शक अभिजित देशपांडे या प्रोजेक्टवर २०१९ पासून काम करत असल्याची माहिती दिली गेली. ही वेब सीरिज ‘झी ५’ या ओटीटी प्लॅटफॉर्मवर प्रदर्शित होणार आहे, यूट्यूब चॅनेलवर या सीरिजचे पोस्टरही प्रदर्शित केले आहे.
विनोद कांबळी आणि सचिन तेंडुलकर यांच्यातील मैत्री
विनोद कांबळी आणि सचिन तेंडुलकर यांची मैत्री क्रिकेटविश्वात नेहमीच चर्चेत राहिली. १९८८ मध्ये हॅरिस शिल्ड स्पर्धेत दोघांनी मिळून ६६४ धावांची विक्रमी नाबाद भागीदारी केली होती. रमाकांत आचरेकर यांच्या मार्गदर्शनाखाली घडलेला हा प्रवासही सीरिजमध्ये पाहायला मिळू शकतो. कांबळीच्या क्रिकेट कारकिर्दीतील यशाबरोबरच त्यानंतर आलेल्या अडचणी आणि आयुष्यातील चढ-उतारांवरही या सीरिजमध्ये प्रकाश टाकला जाण्याची शक्यता आहे.
मुंबई : मॉडेल आणि वेब सिरीज अभिनेत्री अंतरा बॅनर्जी (३१) हिला १२ ऑगस्ट रोजी अरवली एक्सप्रेसमध्ये जागेचे आरक्षण नसल्यामुळे झालेल्या वादानंतर रेल्वे ...
सचिनसोबतच्या मैत्रीत आलेला दुरावा
कांबळी आणि सचिनच्या मैत्रीतील चढ-उतारांचाही या वेब सीरिजमध्ये दाखवण्याची शक्यता आहे. सचिनच्या निवृत्तीच्या वेळी केलेल्या भाषणात त्याने आपलं नाव न घेतल्याने विनोद कांबळीने नाराजी व्यक्त केली होती. त्यामुळे दोघांच्या नात्यात काही काळ दुरावा निर्माण झाल्याची चर्चा झाली होती.
क्रिकेटर ते अभिनेता...
विनोदने क्रिकेटमधून बाहेर पडल्यानंतर अभिनय क्षेत्रातही नशीब आजमावून पाहण्याचं ठरवलं. २००० मध्ये प्रदर्शित झालेल्या ‘अनर्थ’ या चित्रपटात त्याने अभिनेता संजय दत्तसोबत काम केलं होतं. त्यामुळे क्रिकेटपासून अभिनयापर्यंतचा त्याचा प्रवासही या वेब सीरिजचा महत्त्वाचा भाग ठरू शकतो.
विनोद कांबळीच्या आयुष्यातील अनेक घटना आणि किस्से विविध कारणासाठी आजही चर्चेत आहेत. त्यामुळे त्याच्या आयुष्याची ही कहाणी पडद्यावर नेमकी कशी मांडली जाते, कांबळी अन् सचिन यांच्या भूमिका कोण साकारणार? चित्रपटापेक्षा वेब सिरिज हे माध्यम निवडल्याने काय फरक पडणार या सर्वच गोष्टींकडे क्रिकेटप्रेमींचं लक्ष लागलं आहे.
