बांगलादेश क्रिकेट संघाचा माजी कर्णधार आणि माजी खासदार शाकिब अल हसन यांच्या वडिलोपार्जित घरावर पेट्रोल बॉम्बने हल्ला (Petrol Bomb Attack) झाल्याची घटना समोर आली आहे. मगुरा शहरातील केशबमोर परिसरात असलेल्या त्यांच्या घरावर 5 ऑगस्टच्या रात्री सुमारे 8.45 वाजता हा हल्ला झाला. या घटनेत घराची तोडफोड करण्यात आल्याचीही माहिती मिळाली आहे. या प्रकरणामुळे बांगलादेशातील राजकीय वातावरण पुन्हा एकदा चर्चेत आले आहे. ( Bangladesh)
नवी दिल्ली : बांगलादेशात २०२४ मध्ये झालेल्या निदर्शनानंतर शेख हसीना यांनी पंतप्रधान पदाचा राजीनामा देत बांगलादेशातून पलायन केलं होतं. तेव्हापासून ...
मिळालेल्या माहितीनुसार, दिल्लीतील फॉरेन करस्पॉन्डंट्स क्लबमध्ये आयोजित करण्यात आलेल्या एका कार्यक्रमात बांगलादेशच्या माजी पंतप्रधान शेख हसीना यांनी ऑनलाइन माध्यमातून सहभाग घेतला होता. या कार्यक्रमात शाकिब अल हसनही श्रीलंकेतून ऑनलाइन सहभागी झाला होता. विशेष म्हणजे, शेख हसीना यांनी कार्यक्रमातील आपले भाषण सोशल मीडियावर शेअर केले होते. ( Shakib Al Hasan)
या कार्यक्रमात बोलताना शेख हसीना यांनी पुन्हा बांगलादेशात परतण्याची इच्छा व्यक्त केली. कोणतीही परिस्थिती आली तरी आपण आपल्या देशात परतणार असल्याचे त्यांनी सांगितले. तुरुंगवास किंवा इतर कोणत्याही संकटाला सामोरे जावे लागले तरी देशाच्या विकासासाठी, धर्मनिरपेक्ष मूल्यांसाठी आणि नागरिकांच्या हितासाठी आपण बांगलादेशात परतू, असे त्यांनी स्पष्ट केले. (Bangladesh Politics)
त्यांनी डिसेंबर महिन्यात बांगलादेशात परतण्याची इच्छा व्यक्त करत, हा महिना देशाच्या विजयाचे प्रतीक असल्याचेही नमूद केले. सध्याच्या परिस्थितीचा सामना करण्याची तयारी असल्याचेही त्यांनी सांगितले.
भाषणादरम्यान शेख हसीना यांनी आपल्या वडिलांचे, बांगलादेशचे संस्थापक नेते बंगबंधू शेख मुजीबुर रहमान यांना श्रद्धांजली वाहिली. तसेच 15 ऑगस्ट 1975 रोजी झालेल्या त्यांच्या कुटुंबीयांच्या हत्येची आठवण सांगताना त्या भावूक झाल्या. देशाच्या स्वातंत्र्यासाठी बलिदान देणाऱ्या लाखो नागरिकांनाही त्यांनी अभिवादन केले. (Bangladesh Crisis)
दरम्यान, शाकिब अल हसन यांच्या घरावरील हल्ल्यामागील कारण आणि आरोपींबाबत अधिकृत माहिती अद्याप समोर आलेली नाही. या घटनेचा तपास स्थानिक प्रशासनाकडून सुरू असल्याचे सांगितले जात आहे.