Pune News : मुळशी फिरायला जाणाऱ्यांसाठी गुड न्यूज! PMPML विशेष पर्यटन बस सुरू; अवघ्या ₹500 मध्ये निसर्ग सफर

पुणे स्टेशन ते मुळशी विशेष बससेवा सुरू; शिवालय मंदिर, जेटी बोटिंग, मुळशी धरण आणि पळसे धबधबा एका ट्रिपमध्ये

पुणे : पावसाळ्यात मुळशी (Mulshi) आणि ताम्हिणी घाट (Tamhini Ghat) परिसरात फिरण्यासाठी मोठ्या संख्येने पर्यटक गर्दी करतात. मात्र, वीकेंडला होणारी वाहतूक कोंडी आणि प्रवासातील गैरसोय लक्षात घेऊन पुणे महानगर परिवहन महामंडळाने (पीएमपी) पर्यटकांसाठी विशेष पर्यटन बससेवा सुरू केली आहे. 'विशेष पर्यटन बससेवा क्रमांक 9 अ'च्या माध्यमातून पुणेकरांना अवघ्या 500 रुपयांत मुळशीतील प्रमुख पर्यटनस्थळांची सफर करता येणार आहे.

ही विशेष बस पुणे स्टेशन येथून प्रवासाला सुरुवात करणार असून स्वारगेट आणि डेक्कन जिमखाना मार्गे मुळशी परिसरात पोहोचेल. या एकाच प्रवासात पर्यटकांना मुळशी शिवालय मंदिर, जेटी बोटिंग, टाटा मुळशी धरण आणि पळसे धबधबा या प्रमुख पर्यटनस्थळांना भेट देता येणार आहे. दिवसभराची सफर पूर्ण करून ही बस पुन्हा डेक्कन, स्वारगेट मार्गे पुणे स्टेशनला परतणार आहे. (PMPML)

पीएमपीचे अध्यक्ष महेश आव्हाड यांच्या निर्देशानुसार ही विशेष पर्यटन बससेवा 29 जुलैपासून सुरू करण्यात आली आहे. सध्या पीएमपीकडून शहरात 13 पर्यटन मार्गांवर विशेष बससेवा सुरू असून, मुळशी पर्यटन मार्गाची नव्याने भर पडली आहे. (Bus Service)

या बससेवेसाठी ऑनलाइन तसेच ऑफलाइन आरक्षणाची सुविधा उपलब्ध करण्यात आली आहे. डेक्कन जिमखाना, पुणे स्टेशन, स्वारगेट, कात्रज, हडपसर गाडीतळ, भोसरी बसस्थानक, निगडी आणि मनपा भवन या आठ आरक्षण केंद्रांवर तिकीट उपलब्ध आहेत. (One Day Trip)

पावसाळ्यातील निसर्गरम्य वातावरणाचा सुरक्षित, पर्यावरणपूरक आणि किफायतशीर अनुभव घेण्यासाठी नागरिकांनी या विशेष पर्यटन बससेवेचा लाभ घ्यावा, असे आवाहन पीएमपी प्रशासनाने केले आहे.