Earthquake in Nashik : नाशिकमध्ये भूकंपानंतर प्रशासन अलर्ट; धरणे, पूल, शासकीय इमारतींच्या तपासणीचे निर्देश

Earthquake in Nashik : नाशिक जिल्ह्यातील काही तालुक्यांत मागील काही दिवसांपासून सातत्याने भूकंपाचे धक्के जाणवत आहे. यामध्ये प्रामुख्याने सुरगाणा, दिंडोरी, पेठ आणि कळवण तालुक्यांचा समावेश आहे. भूकंपामुळे नागरिकांमध्ये घबराट पसरली आहे. सातत्याने भूकंपाचे धक्के जाणवत असल्याने जिल्हा आपत्ती व्यवस्थापन प्राधिकरणाने (District Disaster Management Authority) या भागातील धरणे, तलाव, मोठे पूल, शासकीय इमारती आदींची पाहणी करण्याचे निर्देश दिले आहेत.

नाशिकमध्ये भूकंपानंतर अलर्ट

सुरगाणा, दिंडोरी, पेठ व कळवण तालुक्यांतील काही भागांत मागील चार दिवसांत २ ते ३.९ रिश्टर स्केल तीव्रतेचे धक्के जाणवले आहेत. राष्ट्रीय भूकंप विज्ञान केंद्र (National Center for Seismology) आणि महाराष्ट्र अभियांत्रिकी संशोधन संस्थेच्या (मेरी) (Maharashtra Engineering Research Institute (MERI)) भूकंपमापन केंद्रात त्याची नोंद झाली आहे. भूकंपाच्या धक्क्यांमुळे जिल्ह्यात कोणतीही जीवितहानी झालेली नाही. मात्र, भविष्यातील संभाव्य धोका टाळण्यासाठी आपत्ती व्यवस्थापन प्राधिकरणाने (District Disaster Management Authority) महत्त्वाच्या पायाभूत सुविधांची सुरक्षितता तपासण्याची गरज व्यक्त केली आहे.

धरणे, पूल, शासकीय इमारतींची तपासणी

दरम्यान, भूकंपाचे धक्के जाणवलेल्या सुरगाणा (Surgana) , दिंडोरी (Dindori) , पेठ (Peth) , कळवण (Kalwan) व त्र्यंबकेश्वर (Trimbakeshwar) या पाच तालुक्यांतील सर्व धरणे, तलाव, मोठे पूल, शासकीय विश्रामगृहे, वसतिगृहे, समाजमंदिरे, शासकीय इमारती आणि शाळांची तातडीने पाहणी करण्याचे निर्देश देण्यात आले आहेत. भूकंपाच्या धक्क्यांमुळे कोणत्याही धरणाच्या भिंतीला, सांडव्याला किंवा पुलाला तडे गेले आहेत का, पाण्याची गळती वाढली आहे का, खचणे किंवा इतर कोणतीही संरचनात्मक हानी झाली आहे का, याची तांत्रिक तपासणी करण्याचे निर्देश प्राधिकरणाने दिले आहेत. तपासणीअंती संभाव्य धोका आढळल्यास तातडीने आवश्यक ती प्रतिबंधात्मक व दुरुस्तीची कार्यवाही हाती घ्यावी, असेही देखील सूचित करण्यात आले आहे.