रेल्वे प्रवास करताना बहुतांश प्रवाशांचे मुख्य ध्येय एका ठिकाणाहून दुसऱ्या ठिकाणी सुखरूप पोहोचणे हेच असते. जर प्रवास त्रासदायक असेल, तर आपला सगळा वेळ बसण्यासाठी जागा मिळवण्यात किंवा सहप्रवाशांशी वाद घालण्यात निघून जातो. पण हाच प्रवास जर आरामदायी असेल, तर आपण खिडकीतून बाहेर पाहत सभोवतालचे निरीक्षण करतो. या निरीक्षणादरम्यान अनेक गोष्टी आपल्या नजरेस पडतात, पण आपण त्यांच्यावर फारसा विचार करत नाही. अशीच एक रंजक आणि अत्यंत महत्त्वाची गोष्ट म्हणजे ट्रेनच्या शेवटच्या डब्यावर असणारे मोठे 'X' चे चिन्ह!
'X' चे चिन्ह नक्की काय दर्शवते ?
रेल्वे स्टेशनवर उभं असताना किंवा रेल्वे फाटकाजवळ थांबले असताना समोरून सुसाट वेगाने जाणाऱ्या ट्रेनच्या शेवटच्या डब्याकडे आपण सर्वांनीच पाहिले असेल. त्या डब्याच्या मागच्या बाजूला पिवळ्या किंवा पांढऱ्या रंगात 'X' हे मोठे अक्षर लिहिलेले दिसते. अनेक प्रवासी याला केवळ एक सामान्य डिझाईन किंवा नेहमीची पाटी मानून दुर्लक्ष करतात. परंतु, हे केवळ एक चिन्ह नसून संपूर्ण ट्रेनच्या आणि हजारो प्रवाशांच्या सुरक्षेशी जोडलेला एक अत्यंत महत्त्वाचा पुरावा आहे. या चिन्हाचा सोपा अर्थ असा होतो की,"हाच या ट्रेनचा शेवटचा डबा आहे आणि संपूर्ण ट्रेन सुरक्षितपणे पुढे निघून गेली आहे."
मुंबई : व्हॉट्सअॅप आपल्या IPhone यूझर्ससाठी चॅटिंगचा अनुभव अधिक आकर्षक करण्यासाठी नव्या डिझाइनवर काम करत आहे. सध्या हे फीचर बीटा व्हर्जनमध्ये (version) ...
हे चिन्ह प्रवाशांसाठी नव्हे, तर कर्मचाऱ्यांसाठी!
अनेक लोकांना असा गैरसमज असतो की, हे चिन्ह प्रवाशांच्या माहितीसाठी लावले जाते; पण ते पूर्णपणे चुकीचे आहे. हे सुरक्षा चिन्ह स्टेशन मास्टर, ट्रेन गार्ड, सिग्नल स्टाफ आणि ट्रॅकवर तैनात असलेल्या रेल्वे कर्मचाऱ्यांसाठी असते. जेव्हा एखादी गाडी स्टेशनवरून किंवा फाटकावरून पुढे जाते, तेव्हा तिथे उपस्थित असलेले कर्मचारी शेवटच्या डब्यावरील या 'X' चिन्हाची पाहणी करतात. हे चिन्ह दिसताच कर्मचाऱ्यांना खात्री पटते की, ट्रेनचा कोणताही डबा मागे सुटलेला नाही आणि सर्व डबे एकमेकांशी सुरक्षित जोडलेले आहेत.
जर डब्यावर 'X' चे चिन्ह दिसले नाही, तर काय घडते ?
जर एखाद्या धावत्या ट्रेनच्या शेवटच्या डब्यावर हे 'X' चे चिन्ह दिसले नाही, तर रेल्वे प्रशासन त्याला अत्यंत आपत्कालीन आणि गंभीर परिस्थिती मानते. अशा वेळी दोन डब्यांमधील 'कपलिंग' (Coupling) तुटून ट्रेनचा काही भाग ट्रॅकवरच मागे राहिल्याची किंवा मोठा अपघात घडल्याची शक्यता असते. 'X' चे चिन्ह न दिसताच स्टेशनवरील कर्मचारी तातडीने मुख्य कंट्रोल रूमला अलर्ट देतात. यानंतर सुरक्षेचा उपाय म्हणून त्या मार्गावरील इतर सर्व गाड्या त्वरित थांबवल्या जातात आणि तातडीने रेल्वे ट्रॅकचा तपास सुरू केला जातो.
'LV' या बोर्डचा नेमका अर्थ काय ?
'X' या चिन्हाच्या अगदी शेजारीच एका छोट्या लाल किंवा पिवळ्या पाटीवर 'LV' असे लिहिलेले तुम्हाला नक्कीच दिसले असेल. इंग्रजीतील 'Last Vehicle' या शब्दांचे हे संक्षिप्त रूप आहे, ज्याचा मराठीत अर्थ 'शेवटचे वाहन किंवा शेवटचा डबा' असा होतो. 'X' या चिन्हाप्रमाणेच 'LV' चा बोर्डसुद्धा रेल्वे कर्मचाऱ्यांना ही ट्रेन पूर्ण आणि सुरक्षित असल्याचे स्पष्ट संकेत देतो.