Oil Prices : मध्य पूर्वेतील तणावाचा तेलबाजारावर परिणाम! इराण, अमेरिका तहाच्या विलंबामुळे तेलाच्या किमती पुन्हा वाढल्या; ब्रेंट क्रूड ९६ डॉलरपार

- हॉर्मुझ सामुद्रधुनीतील तणावामुळे जागतिक तेलपुरवठ्यावर संकट; भारतावरही होणार परिणाम

नवी दिल्ली : मध्य पूर्वेतील वाढत्या भू-राजकीय तणावामुळे आंतरराष्ट्रीय बाजारात कच्च्या तेलाच्या किमतींनी पुन्हा एकदा मोठी उसळी घेतली आहे. इराण-अमेरिका चर्चेत अपेक्षित प्रगती न झाल्याने आणि लाल समुद्रातील सुरक्षेची परिस्थिती आणखी बिघडल्याने ब्रेंट क्रूडचा दर प्रति बॅरल ९६ डॉलरच्या पुढे गेला आहे. गेल्या सहा आठवड्यांतील हा सर्वोच्च स्तर असून, जागतिक ऊर्जा बाजारात नव्याने अस्थिरतेचे वातावरण निर्माण झाले आहे. (Oil Prices)

येमेनमधील हुती बंडखोरांनी लाल समुद्रात सौदी अरेबियाशी संबंधित तेलवाहू जहाजांवर हल्ले केल्याची माहिती समोर आली आहे. तसेच, सौदीच्या बंदरांकडे जाणाऱ्या जहाजांना लक्ष्य करण्याचा आणि नौदल नाकेबंदीचा इशाराही देण्यात आल्याने जागतिक व्यापारासाठी अत्यंत महत्त्वाच्या बाब-अल-मंदेब सामुद्रधुनीतील सुरक्षेचा प्रश्न अधिक गंभीर बनला आहे. (Oil Prices)

याचवेळी हॉर्मुझ सामुद्रधुनी परिसरातही तणाव कायम आहे. जगातील मोठ्या प्रमाणातील तेलपुरवठा या दोन महत्त्वाच्या सागरी मार्गांवर अवलंबून असल्याने ऊर्जा बाजारात चिंता वाढली आहे. विश्लेषकांच्या मते, परिस्थिती आणखी चिघळल्यास दररोज सुमारे ५० लाख बॅरल तेलपुरवठ्यावर परिणाम होण्याची शक्यता आहे. (Oil Prices)

तेलाच्या वाढत्या किमतींचा सर्वाधिक फटका भारतासारख्या कच्चे तेल आयात करणाऱ्या देशांना बसू शकतो. भारत आपल्या गरजेपैकी बहुतांश कच्चे तेल आयात करत असल्याने आंतरराष्ट्रीय बाजारातील दरवाढीचा परिणाम पेट्रोल-डिझेलच्या किमती, वाहतूक खर्च आणि महागाईवर होण्याची शक्यता व्यक्त केली जात आहे. (Oil Prices)

अर्थतज्ज्ञांच्या मते, मध्य पूर्वेतील संघर्ष दीर्घकाळ सुरू राहिल्यास जागतिक अर्थव्यवस्थेवरही त्याचे नकारात्मक परिणाम होऊ शकतात. काही आंतरराष्ट्रीय गुंतवणूक बँकांनी परिस्थिती आणखी बिघडल्यास ब्रेंट क्रूडचा दर १२० डॉलर प्रति बॅरलपर्यंत पोहोचू शकतो, असा अंदाज व्यक्त केला आहे. मध्य पूर्वेतील घडामोडी, इराण-अमेरिका चर्चेची दिशा आणि लाल समुद्रातील सुरक्षेची परिस्थिती यावरच आता जागतिक तेलबाजाराचे भवितव्य अवलंबून असल्याचे तज्ज्ञांचे मत आहे. (Oil Prices)