Crime News : सिंगापूरमध्ये बनावट हिऱ्याच्या मदतीने 2 लाख डॉलरच्या हिऱ्याची चोरी; दोन भारतीयांना अटक

नवी दिल्ली : सिंगापूरच्या चायनाटाउनमधील एका दागिन्यांच्या दुकानातून सुमारे 2 लाख सिंगापूर डॉलर (1.54 लाख अमेरिकी डॉलर) किमतीचा हिरा चोरण्याचा कट रचल्याप्रकरणी दोन भारतीय नागरिकांपैकी पहिल्या आरोपीला कारावासाची शिक्षा सुनावण्यात आली आहे.

या प्रकरणात 41 वर्षीय मंगरोलिया मनोजकुमार कुरजीभाई याने चोरीचा गुन्हा कबूल केल्यानंतर न्यायालयाने त्याला दोन वर्षे, दोन महिने आणि दोन आठवड्यांच्या कारावासाची शिक्षा ठोठावली. तर त्याचा साथीदार, 30 वर्षीय सेरासिया मिलन रामनीकभाई याच्या प्रकरणाची सुनावणी शुक्रवारी होणार आहे. हे दोघे भारतीय नागरिक एका समान मित्रामार्फत एकमेकांच्या संपर्कात आले होते आणि सोशल पासवर सिंगापूरला आले होते. सिंगापूरला येण्यापूर्वी त्यांनी सुरतमध्ये एक बनावट हिरा तयार करून घेतला होता. हा बनावट हिरा मूळ हिऱ्याच्या आकारमान आणि सीरियल नंबरशी तंतोतंत जुळणारा बनवण्यात आला होता. मात्र, त्यांना मूळ हिऱ्याची ही माहिती आधीपासून कशी मिळाली, याचा उल्लेख न्यायालयीन कागदपत्रांमध्ये नाही. त्यांची योजना अशी होती की मंगरोलिया दुकानातील विक्री व्यवस्थापकाचे लक्ष विचलित करेल आणि मिलन आपल्या तोंडात लपवून ठेवलेल्या बनावट हिऱ्याच्या मदतीने खऱ्या हिऱ्याची अदलाबदल करेल.

दोन्ही आरोपी 19 जून 2026 रोजी सिंगापूरमध्ये दाखल झाले. त्यांचा उद्देश चायनाटाउनमधील ‘डायनोचे’ या दागिन्यांच्या दुकानातून 4.95 कॅरेटचा मौल्यवान हिरा चोरण्याचा होता.

दुपारी सुमारे 3 वाजता ते दुकानात गेले आणि हिरा पाहण्याची विनंती केली. मंगरोलियाने विक्री व्यवस्थापकाला दुकानातील इतर वस्तू दाखवण्यास सांगून त्याचे लक्ष दुसरीकडे वळवले. त्याचवेळी त्याच्या इशाऱ्यावर मिलनने तोंडातून बनावट हिरा काढून खऱ्या हिऱ्याशी त्याची अदलाबदल केली. त्याने खरा हिरा आपल्या तोंडात लपवून ठेवला. मात्र, त्याची ही संपूर्ण कृती सीसीटीव्ही कॅमेऱ्यात कैद झाली. त्यानंतर दोघांनी ‘खरेदीबाबत विचार करू’ असे सांगून दुकान सोडले. आरोपी गेल्यानंतर विक्री व्यवस्थापकाने मशीनद्वारे तपासणी केली असता हिरा बनावट असल्याचे उघड झाले. त्यानंतर दोघेही त्यांच्या हॉटेलमध्ये परतले, नियोजित वेळेपूर्वी चेक-आउट केले आणि भारतासाठी विमानाचे तिकीट बुक केले. मात्र, त्याच रात्री सुमारे 8.50 वाजता चांगी विमानतळाच्या टर्मिनल 3 येथे इमिग्रेशन प्रक्रियेदरम्यान त्यांना अटक करण्यात आली. मिलनच्या बॅगेतून खरा हिरा जप्त करण्यात आला.

सरकारी वकील यिप चेंग यी यांनी न्यायालयात सांगितले की, हा एक पूर्वनियोजित आणि विचारपूर्वक आखलेला गुन्हेगारी कट होता. दोन्ही आरोपी केवळ हा गुन्हा करण्याच्या उद्देशाने सिंगापूरमध्ये आले होते. मंगरोलियाने दुभाष्याच्या माध्यमातून न्यायालयाकडे कमी शिक्षेची विनंती केली. त्याने भारतात त्याची दोन मुले असल्याचे सांगितले. या गुन्ह्यासाठी कमाल सात वर्षांच्या कारावासाची तसेच दंडाची तरतूद आहे.