सीएसएमटी स्थानकावर धक्कादायक प्रकार; एक्स्प्रेसमध्ये आढळला मानवी पायाचा तुकडा, पोलीस तपास सुरु
मुंबई : छत्रपती शिवाजी महाराज टर्मिनस (CSMT) येथे आलेल्या अमृतसर–CSMT एक्स्प्रेसमध्ये मानवी पायाचा तुकडा आढळल्याने एकच खळबळ उडाली आहे. रेल्वे यार्डात गाडीच्या स्वच्छतेचे काम सुरू असताना हा प्रकार उघडकीस आला. या घटनेनंतर सरकारी रेल्वे पोलीस (GRP) आणि रेल्वे सुरक्षा दलाने (RPF) तपास सुरू केला आहे. (Mumbai News)
मिळालेल्या माहितीनुसार, अमृतसरहून आलेली एक्स्प्रेस सकाळी CSMT येथे दाखल झाली होती. त्यानंतर गाडी नेहमीप्रमाणे यार्डात नेऊन स्वच्छता आणि देखभालीचे काम सुरू करण्यात आले. यावेळी M-2 डब्याखाली गुडघ्याखालचा मानवी पायाचा तुकडा आढळून आला. हा प्रकार लक्षात येताच कर्मचाऱ्यांनी तातडीने रेल्वे प्रशासन आणि पोलिसांना माहिती दिली. (Amritsar express)
घटनास्थळी दाखल झालेल्या GRP पथकाने पंचनामा करून संबंधित मानवी अवयव ताब्यात घेतला. पुढील तपासासाठी तो सेंट जॉर्ज रुग्णालयात पाठविण्यात आला आहे. (Railway)
पोलीस तपास सुरु
या मानवी अवयवाचा नेमका संबंध कोणाशी आहे, तो गाडीत कसा अडकला आणि ही घटना नेमकी कुठे घडली, याचा शोध पोलीस घेत आहेत. यासाठी अमृतसर एक्स्प्रेसच्या संपूर्ण प्रवासाची माहिती तपासली जात असून, मार्गावरील विविध रेल्वे विभागांशी संपर्क साधण्यात आला आहे. तसेच प्रवासादरम्यान कोणता रेल्वे अपघात झाला होता का किंवा एखादी व्यक्ती बेपत्ता असल्याची नोंद आहे का, याची पडताळणी सुरू आहे. (Crime News)
रेल्वे प्रशासनाच्या प्राथमिक माहितीनुसार, संबंधित व्यक्तीला रेल्वे रुळ ओलांडताना अपघात (Accident) झाला असण्याची शक्यता तपासली जात आहे. मात्र, याबाबत अद्याप कोणतीही अधिकृत पुष्टी करण्यात आलेली नाही.
या घटनेमुळे रेल्वे सुरक्षेचा मुद्दा पुन्हा चर्चेत आला असून, संबंधित व्यक्तीची ओळख आणि घटनेमागील नेमके कारण शोधण्यासाठी GRP कडून सखोल तपास सुरू आहे.