TMKOC : 'तारक मेहता का उल्टा चष्मा' बंद होणार? गोकुळधाम सोसायटीच्या तोडफोडीच्या व्हिडिओने चाहत्यांमध्ये खळबळ

Taarak Mehta Ka Ooltah Chashma : 'तारक मेहता का उल्टा चष्मा' ही गेली १७ वर्षे प्रेक्षकांचे मनोरंजन करणारी लोकप्रिय मालिका आहे. या मालिकेतील गोकुळधाम सोसायटी हा सेट प्रेक्षकांसाठी खास आकर्षण ठरला आहे. मात्र, सोशल मीडियावर समोर आलेल्या एका व्हायरल व्हिडिओमुळे चाहते संभ्रमात पडले आहेत.

गोकुळधाम सोसायटीच्या तोडफोडीने खळबळ

व्हिडीओमध्ये गोकुलधाम सोसायटीच्या सेटवर मोठ्या प्रमाणात तोडफोड सुरू असल्याचे दिसत आहे. चारही बाजूला मजूर काम करताना दिसत आहेत आणि संपूर्ण सेट लाकडी खांब आणि फळ्यांनी झाकलेला आहे. हे दृश्य पाहिल्यानंतर फॅन्स खूप चिंताग्रस्त झाले आणि प्रश्न विचारू लागले की, गोकुळधाम सोसायटी कायमची बंद होत आहे का ? व्हिडीओ व्हायरल झाल्यावर फॅन्सनी वेगवेगळे अंदाज लावायला सुरुवात केली. कोणीतरी विचारले की सेट का तोडला जात आहे, शो बंद होणार आहे का? तर कुणीतरी म्हणाले की, आता गोकुळधामचा संपूर्ण सेट बदलणार आहे का? काहींनी तर गोकुळधामचा सेट कायमचा हटवला जात असल्याचा अंदाजही व्यक्त केला.  (Taarak Mehta Ka Ooltah Chashma)

असित कुमार मोदी यांनी सांगितले सत्य

दरम्यान, वाढत्या चर्चेनंतर मालिकेचे निर्माते असित कुमार मोदी यांनी स्वतः याबाबत स्पष्टीकरण दिले आहे. त्यांनी सांगितले की, गोकुळधाम सोसायटीचा (Gokuldham Society) सेट हटवला जात नसून त्याचे नूतनीकरण सुरू आहे. असित मोदी म्हणाले, "जे काही सुरू आहे ते प्रेक्षकांच्या आनंदासाठीच आहे. गोकुळधाम सोसायटीला नव्या स्वरूपात साकारले जात आहे. काही दिवसांतच प्रेक्षकांना हा सेट पूर्णपणे नव्या लूकमध्ये पाहायला मिळेल." (Taarak Mehta Ka Ooltah Chashma)

गोकुळधाम सोसायटी लवकरच नव्या रूपात

सध्या असित मोदी स्वतः कामाची पाहणी करत असून अभियंते, सुपरवायझर आणि कामगारांशी चर्चा करून काम सुरक्षित आणि नियोजनबद्ध पद्धतीने पूर्ण करण्याच्या सूचना देताना दिसत आहेत. त्यामुळे 'तारक मेहता का उल्टा चष्मा' मालिका बंद होणार नसून, गोकुळधाम सोसायटी लवकरच नव्या रूपात प्रेक्षकांच्या भेटीला येणार असल्याचे स्पष्ट झाले आहे.

'तारक मेहता का उल्टा चश्मा' मालिकेच्या या 17 वर्षांच्या दीर्घ प्रवासात अनेक कलाकारांनी शोला अलविदा केला, तर काही नवीन चेहऱ्यांनी आपली जागा निर्माण केली. पण एक गोष्ट आहे जी नेहमी प्रेक्षकांच्या मनात विशेष स्थान मिळवून ठेवते, ती म्हणजे गोकुळधाम सोसायटी. हीच ती जागा आहे, जिथे जेठालाल, भिडे, पोपटलाल, अय्यर, डॉ. हाथी आणि इतर सर्व पात्रांच्या नवनवीन कहाण्या जन्म घेतात. त्यामुळे हा सेट प्रेक्षकांच्या जिव्हाळ्याचा विषय आहे.