Pravin Darekar : विधानपरिषदेच्या उपसभापतीपदी सचिन अहिर यांची एकमताने निवड; 'विद्यार्थी चळवळीतून आलेला मित्र सर्वोच्च पदावर पोहोचल्याचा आनंद' – आ. प्रवीण दरेकर

मुंबई : विधानपरिषदेच्या उपसभापतीपदी शिवसेनेचे आमदार सचिन अहिर (Sachin Ahir)यांची आज एकमताने निवड करण्यात आली. या ऐतिहासिक क्षणानंतर सभागृहात सादर झालेल्या अभिनंदन प्रस्तावावर बोलताना भारतीय जनता पक्षाचे गटनेते आमदार प्रवीण दरेकर (Pravin Darekar) यांनी सचिन अहिर यांचे भरभरून कौतुक केले. "विद्यार्थी चळवळ आणि महाविद्यालयीन निवडणुकांपासून सुरू झालेला एक जुना, हुशार मित्र आज विधिमंडळाच्या सर्वोच्च सभागृहाच्या उपसभापती पदावर विराजमान होत आहे, हा माझ्यासाठी अत्यंत आनंदाचा आणि अभिमानाचा क्षण आहे," अशा भावना आमदार दरेकर यांनी यावेळी व्यक्त केल्या.

सचिन अहिर (Sachin Ahir) यांच्या बहुआयामी नेतृत्वाचा उल्लेख करताना आमदार प्रवीण दरेकर म्हणाले की, महाराष्ट्रात असे एकही क्षेत्र नाही, जिथे सचिन अहिर यांनी आपल्या कर्तृत्वाने ठसा उमटवला नाही. त्यांची विधिमंडळातील कारकीर्द अत्यंत संस्मरणीय राहिली असून, त्यांनी विधानसभा आणि विधान परिषद अशा दोन्ही सभागृहांचा गाढा अनुभव घेतला आहे. यापूर्वी म्हाडाचे अध्यक्ष आणि राज्याचे गृहनिर्माण राज्यमंत्री म्हणून त्यांनी केलेले काम संपूर्ण महाराष्ट्राने आणि विधिमंडळाने जवळून पाहिले आहे. क्रिकेट जगतात ज्याप्रमाणे सचिन तेंडुलकर अष्टपैलू आहे, तसेच राजकारणात सचिन अहिर हे एक अष्टपैलू नेते आणि तितकेच तत्पर कार्यकर्ते आहेत, अशा शब्दांत दरेकरांनी (Pravin Darekar) त्यांच्या कामाची तुलना केली. कामगार क्षेत्रासह सहकार, सामाजिक आणि क्रीडा क्षेत्रातही त्यांनी नेहमीच अग्रेसर भूमिका घेतली आहे.

आमदार दरेकर (Pravin Darekar) यांनी सचिन अहिर यांच्या राजकीय प्रगतीचा आणि अनुभवाचा गौरव करताना सांगितले की, सचिन अहिर यांनी नेहमीच योग्य वेळी योग्य निर्णय घेतले आहेत. त्यांना सत्ताधारी आणि विरोधी पक्ष अशा दोन्ही बाजूंचा प्रदीर्घ अनुभव असल्यामुळे, त्यांनी आजवर सोपवलेली प्रत्येक जबाबदारी अत्यंत लीलया आणि सक्षमपणे पार पाडली आहे. हाच दांडगा अनुभव त्यांना उपसभापती पदाचे कामकाज चालवताना नक्कीच मार्गदर्शक ठरेल, असा विश्वासही त्यांनी व्यक्त केला.

विधानपरिषदेच्या उपसभापती पदाचा एक मोठा आणि गौरवशाली इतिहास आहे. या सर्वोच्च पदावर आजवर अनेक मोठ्या नेत्यांनी आपल्या कर्तृत्वाने इतिहास निर्माण केला आहे. नुकताच डॉ. नीलम गोऱ्हे यांनी उपसभापती म्हणून काम पाहताना महिलांचे प्रश्न आणि सामाजिक विषय अत्यंत संवेदनशीलतेने हाताळले. तशाच संवेदनशीलतेने आणि सर्वसमावेशकतेने सचिन अहिर हे देखील या पदाची गरिमा वाढवतील आणि संपूर्ण सभागृहाला न्याय देतील, अशी खात्री व्यक्त करत आमदार प्रवीण दरेकर (Pravin Darekar) यांनी त्यांना या पुढील यशस्वी कारकीर्दीसाठी मनापासून शुभेच्छा दिल्या.