America - Iran War : अमेरिका-इराण संघर्ष पुन्हा भडकला! अमेरिकेचे ३९ ठिकाणांवर हवाई हल्ले; IRGC कडून आखातातील अमेरिकी तळांवर प्रत्युत्तर

नवी दिल्ली : अमेरिका आणि इराण यांच्यात नुकत्याच झालेल्या शांतता करारानंतर निर्माण झालेली शांतता फार काळ टिकली नाही. होर्मुझच्या सामुद्रधुनीत व्यापारी जहाजावर झालेल्या ड्रोन हल्ल्यानंतर अमेरिकेने इराणविरुद्ध मोठी लष्करी कारवाई करत क्षेपणास्त्र आणि ड्रोन तळांसह किनारी रडार केंद्रांवर हवाई हल्ले केले. त्यानंतर इराणच्या इस्लामिक रिव्होल्यूशनरी गार्ड कॉर्प्स (IRGC) नेही आखाती प्रदेशातील अमेरिकी तळांवर प्रत्युत्तरात्मक हल्ला केल्याचा दावा केला आहे. त्यामुळे मध्य पूर्वेतील तणाव पुन्हा एकदा शिगेला पोहोचला आहे. (America - Iran War)

अमेरिकेच्या सेंट्रल कमांड (CENTCOM) ने या कारवाईची माहिती देताना इराणमधील ३९ लष्करी लक्ष्यांवर अचूक हल्ले करण्यात आल्याचा दावा केला. या कारवाईचा ३७ सेकंदांचा व्हिडिओही प्रसिद्ध करण्यात आला आहे. मात्र, सुरक्षेच्या कारणास्तव हल्ले नेमके कोणत्या भागात झाले, याची अधिकृत माहिती देण्यात आलेली नाही. (America - Iran War)

व्यापारी जहाजावरील हल्ल्यानंतर अमेरिकेची कारवाई :

अमेरिकेच्या म्हणण्यानुसार, २५ जून रोजी 'एम/व्ही एव्हर लवली' या सिंगापूरच्या ध्वजाखाली नोंदणीकृत व्यापारी जहाजावर ड्रोनद्वारे हल्ला करण्यात आला होता. हे जहाज ओमानच्या किनाऱ्याजवळून होर्मुझच्या सामुद्रधुनीतून प्रवास करत असताना हा हल्ला झाला. अमेरिकेने या घटनेला शस्त्रसंधीचे उल्लंघन मानत लष्करी प्रत्युत्तर दिले. CENTCOM ने स्पष्ट केले की, होर्मुझच्या सामुद्रधुनीतून आंतरराष्ट्रीय व्यापारी जहाजांची सुरक्षित वाहतूक सुनिश्चित करणे ही अमेरिकेची जबाबदारी आहे. जगातील सुमारे २० टक्के कच्चे तेल आणि इंधनाची वाहतूक या सामुद्रधुनीतून होत असल्याने या मार्गावरील कोणताही हल्ला जागतिक ऊर्जा सुरक्षेसाठी गंभीर मानला जातो. (America - Iran War)

IRGC कडून प्रत्युत्तराचा दावा :

अमेरिकेच्या हवाई कारवाईनंतर काही तासांतच इराणच्या इस्लामिक रिव्होल्यूशनरी गार्ड कॉर्प्स (IRGC) ने आखातातील अमेरिकेच्या लष्करी तळांवर हल्ला केल्याचा दावा केला. या कारवाईबाबत सविस्तर माहिती देण्यात आलेली नसली तरी, अमेरिकेने पुन्हा अशा प्रकारची कारवाई केल्यास त्याहून अधिक कठोर आणि व्यापक प्रत्युत्तर दिले जाईल, असा इशारा IRGC ने दिला आहे. (America - Iran War)

मध्य पूर्वेतील तणाव पुन्हा वाढला :

शांतता करारानंतर संघर्ष थांबेल, अशी अपेक्षा व्यक्त केली जात होती. मात्र, व्यापारी जहाजांवरील हल्ले, त्यानंतरची अमेरिकेची लष्करी कारवाई आणि इराणचे प्रत्युत्तर यामुळे पुन्हा एकदा मध्य पूर्वेतील परिस्थिती तणावपूर्ण बनली आहे. या घडामोडींमुळे आंतरराष्ट्रीय व्यापार, तेलाच्या किमती आणि प्रादेशिक सुरक्षेवर मोठा परिणाम होण्याची शक्यता व्यक्त केली जात आहे. (America - Iran War)

दरम्यान, अमेरिका आणि इराण या दोन्ही देशांकडून पुढील हालचालींवर जगाचे लक्ष लागले असून, संघर्ष आणखी तीव्र होणार की राजनैतिक मार्गाने तोडगा निघणार, याबाबत अनिश्चितता कायम आहे.