महिनाभरात ३५ हजारांहून अधिक दुकानांच्या तपासणीतून झाले उघड
मुंबई : मराठी भाषेतील नामफलक सक्तीच्या अंमलबजावणीसाठी मुंबई महानगरपालिकेने राबविलेल्या विशेष धाडसत्रात मराठी नामफलक न लावणाऱ्या १,१२४ आस्थापनांवर कारवाई करण्यात आली आहे. शहरातील प्रमुख रस्ते, व्यावसायिक केंद्रे आणि दर्शनी भागातील आस्थापनांची तपासणी करून ही मोहीम राबविण्यात आली.
उपमहापौर संजय घाडी , विधी समिती अध्यक्षा दिक्षा कारकर आणि उपायुक्त (विशेष) विनायक विसपुते यांच्या निर्देशानुसार १४ मे ते १२ जून २०२६ या कालावधीत सर्व प्रशासकीय विभागांमध्ये संयुक्त धाडसत्र आयोजित करण्यात आले होते. महाराष्ट्र दुकाने व आस्थापना अधिनियमांतर्गत मराठी भाषेत नामफलक लावणे बंधनकारक असल्याने महापालिकेने याबाबत ही विशेष मोहीम हाती घेतली.
स्थायी समिती सदस्याने केली विचारणा समितीपुढे माहिती सादर करण्याची केली मागणी मुंबई (विशेष प्रतिनिधी) मुंबई महापालिकेतील नोकर भरतीमध्ये आरक्षित ...
या मोहिमेदरम्यान एकूण ३५ हजार ४२८ दुकाने/ आस्थापनांची पाहणी करण्यात आली. त्यापैकी ३४ हजार ३०४ दुकाने/आस्थापनांनी मराठी भाषेतील नामफलक लावल्याचे आढळले. मात्र, १,१२४ दुकाने/ आस्थापनांमध्ये नियमांचे पालन करण्यात आले नसल्याने संबंधित आस्थापनधारकांविरुद्ध कायदेशीर कारवाई करण्यात आली.
मुख्य रस्ते आणि व्यावसायिक पट्ट्यांवर विशेष लक्ष
महापालिकेने शहरातील प्रमुख मार्ग, बाजारपेठा आणि व्यावसायिक केंद्रांमधील दर्शनी भागातील आस्थापनांची प्राधान्याने तपासणी केली. मराठी नामफलकाबाबत सर्वोच्च न्यायालयाच्या निर्णयानंतर राज्यभरात अंमलबजावणीवर भर दिला जात असून मुंबईतही या मोहिमेला अधिक गती देण्यात आली आहे.
कठोर कारवाई सुरूच राहणार...
राज्य शासनाच्या निर्देशांनुसार मराठी भाषेचा वापर वाढविणे आणि नागरिकांना स्थानिक भाषेत माहिती उपलब्ध करून देणे हा या मोहिमेचा मुख्य उद्देश आहे. आगामी काळातही अशा धाडसत्रांची व्याप्ती वाढविण्यात येणार असून नियमांचे उल्लंघन करणाऱ्यांवर कठोर कारवाई सुरूच राहणार असे विधी समिती अध्यक्ष दिक्षा कारकर यांनी स्पष्ट केले
मराठी नामफलक मोहिमेची आकडेवारी
एकूण तपासणी केलेली आस्थापने ३५,४२८
मराठी नामफलक असलेली आस्थापने ३४,३०४
मराठी नामफलक नसलेली आस्थापने १,१२४
तपासणी कालावधी १४ मे ते १२ जून २०२६