गुजरात : गुजरातमधील सरदार वल्लभभाई पटेल आंतरराष्ट्रीय (SVPI) विमानतळावर सीमाशुल्क विभागाने मोठी कारवाई केली आहे. तब्बल 4.26 कोटी रुपयांचे विदेशी सोने जप्त करण्यात आले आहे. दुबईहून अहमदाबाद येथे आलेल्या इंडिगोच्या 6E-1478 या विमानात हे सोने चतुराईने लपवले होते.
View this post on Instagram
सीमाशुल्क (कस्टम्स) अधिकार्यांनी शनिवार 13 जून 2026 रोजी विमानाची सखोल तपासणी केली. यावेळी विमानातील सहकारी कर्मचाऱ्यांच्या मदतीने विमानाच्या पुढील शौचालयातील स्पीकर बॉक्सची तपासणी करण्यात आली. त्यामध्ये काळ्या प्लास्टिक टेपने गुंडाळलेले दोन संशयास्पद पाऊच आढळून आले. या पाऊचची तपासणी केली असता त्यामध्ये 999.0 शुद्धतेची (24 कॅरेट) एकूण 24 विदेशी सोन्याची बिस्किटे सापडली. या सोन्याचे एकूण वजन 2,799.3 ग्रॅम असून त्याचे बाजारमूल्य चार कोटी 26 लाख 89 हजार 325 रुपये इतके असल्याचे अधिकाऱ्यांनी सांगितले. सीमाशुल्क विभागाच्या प्राथमिक तपासणीत हे सोने भारतात बेकायदेशीररीत्या आणण्याच्या उद्देशाने विमानात लपवण्यात आल्याचा संशय व्यक्त करण्यात आला आहे. विशेष म्हणजे, जप्त करण्यात आलेल्या सोन्यावर मालकी हक्क सांगण्यासाठी कोणतीही व्यक्ती पुढे आली नाही. त्यामुळे सीमाशुल्क कायदा 1962 अंतर्गत संबंधित नियमांनुसार, सर्व सोने जप्त करण्यात आले आहे. या प्रकरणी पुढील तपास सुरू असून तस्करीमागील व्यक्ती किंवा रॅकेटचा शोध घेण्याचे काम सुरू असल्याची माहिती सीमाशुल्क विभागाने दिली. सीमाशुल्क विभागाने या कारवाईचा व्हिडीओही प्रसिद्ध केला असून, विमानतळांमार्फत होणाऱ्या सोन्याच्या तस्करीवर लक्ष ठेवण्यासाठी तपास यंत्रणा अधिक सतर्क झाल्याचे दिसून येत आहे.
