Arjun Tendulkar T20 Mumbai League : ज्युनिअर तेंडुलकरचा धडाका! पहिल्याच स्पेलमध्ये ३ विकेट्स, मग ३४ चेंडूत ६६ धावा; सर्वांकडून होतोय कौतुकाचा वर्षाव

मुंबई : वानखेडे स्टेडियमवर खेळल्या गेलेल्या टी-२० मुंबई लीग २०२६ मधील सामन्यात अर्जुन तेंडुलकर (Arjun Tendulkar) याने अष्टपैलू खेळी करत सर्वांचे लक्ष वेधून घेतले. गोलंदाजीत प्रतिस्पर्धी संघाची कंबर मोडल्यावर फलंदाजीतही वादळी अर्धशतक झळकावत अर्जुनने ‘आर्क्स अंधेरी’ संघाला ‘वांद्रे ब्लास्टर्स’वर ९ गडी राखून दणदणीत विजय मिळवून दिला. या सामन्यात अर्जुनचा अक्षरशः ‘वन मॅन शो’ पाहायला मिळाला. (Arjun Tendulkar T20 Mumbai League)

गोलंदाजीत अर्जुनचा कहर :

नाणेफेक जिंकून प्रथम फलंदाजी करणाऱ्या वांद्रे ब्लास्टर्सची सुरुवातच खराब झाली. आर्क्स अंधेरीच्या गोलंदाजांनी सुरुवातीपासूनच अचूक मारा करत प्रतिस्पर्धी फलंदाजांना बांधून ठेवले. यामध्ये अर्जुन तेंडुलकर सर्वाधिक प्रभावी ठरला. त्याने अवघ्या ३ षटकांत फक्त ११ धावा देऊन ३ महत्वाच्या विकेट्स घेतल्या. विशेष म्हणजे त्याच्या खात्यात एक निर्धाव (मिडन) षटकही जमा झाले. अर्जुनच्या भेदक गोलंदाजीमुळे वांद्रे ब्लास्टर्सला २० षटकांत ९ बाद १४४ धावांपर्यंतच मजल मारता आली. (Arjun Tendulkar T20 Mumbai League)

मुशीरसोबत ११६ धावांची विजयी भागीदारी :

१४५ धावांच्या लक्ष्याचा पाठलाग करताना आर्क्स अंधेरीला सुरुवातीला धक्का बसला. सलामीवीर दिव्यांश सक्सेना २६ धावा करून बाद झाला. मात्र त्यानंतर मैदानात आलेल्या मुशीर खान (Mushir Khan) आणि अर्जुन तेंडुलकर यांनी सामन्याचा रंगच बदलून टाकला. दोघांनी दुसऱ्या विकेटसाठी नाबाद ११६ धावांची भागीदारी रचत वांद्रेच्या गोलंदाजांचा अक्षरशः समाचार घेतला. मैदानाच्या चारही बाजूंना फटकेबाजी करत त्यांनी सामना एकतर्फी केला. (Arjun Tendulkar T20 Mumbai League)

३४ चेंडूत ६६ धावांची तुफानी खेळी :

फलंदाजीत अर्जुनने आक्रमक अवतार धारण केला. त्याने केवळ ३४ चेंडूंमध्ये ६६ धावांची झंझावाती खेळी साकारली. त्याच्या या खेळीत चौकार आणि षटकारांची आतषबाजी पाहायला मिळाली. दुसऱ्या बाजूला मुशीर खानने ३८ चेंडूंमध्ये ५४ धावा करत त्याला उत्तम साथ दिली. या दोघांच्या अर्धशतकांच्या जोरावर आर्क्स अंधेरीने अवघ्या १३.५ षटकांत १४५ धावांचे लक्ष्य पार केले. विशेष म्हणजे संघाने तब्बल ३७ चेंडू राखून विजय मिळवला. (Arjun Tendulkar T20 Mumbai League)

सामन्याचा खरा हिरो अर्जुन :

गोलंदाजीत ३ विकेट्स, फलंदाजीत नाबाद ६६ धावा आणि संघाला सहज विजय मिळवून देणारी कामगिरी यामुळे अर्जुन तेंडुलकरच या सामन्याचा सर्वात मोठा नायक ठरला. त्याच्या या अष्टपैलू खेळीमुळे आर्क्स अंधेरीने स्पर्धेत आपले वर्चस्व सिद्ध केले असून, आगामी सामन्यांसाठी प्रतिस्पर्धी संघांना धोक्याचा इशारा दिला आहे. (Arjun Tendulkar T20 Mumbai League)