ओडिशामध्ये (odisha) भ्रष्टाचाराविरोधात (Corruption) मोठी कारवाई करत लाचलुचपत प्रतिबंधक विभागाने (Anti-Corruption Bureau) एका सरकारी अभियंत्याच्या मालमत्तांवर एकाच वेळी छापे टाकले. या कारवाईत बँक लॉकरमधून तब्बल २ कोटी रुपयांची रोकड जप्त करण्यात आल्याने खळबळ उडाली आहे.
कंदामाल जिल्ह्यातील बालिगुडा येथील आयटीडीएचे सहाय्यक कार्यकारी अभियंता बैकुंठनाथ बेहेरा यांच्याविरोधात उत्पन्नापेक्षा जास्त मालमत्ता जमा केल्याची तक्रार प्राप्त झाली होती. त्यानंतर विशेष न्यायालयाच्या आदेशानुसार भुवनेश्वर, बालासोर, जाजपूर आणि बालिगुडा येथील एकूण ९ ठिकाणी छापेमारी करण्यात आली.
तपासादरम्यान बेहेरा आणि त्यांच्या कुटुंबीयांच्या नावावर असलेल्या ५ बहुमजली इमारतींचा शोध लागला. यामध्ये भुवनेश्वरमधील मोठ्या चार मजली इमारतीचाही समावेश आहे. याशिवाय १३ भूखंडांची माहितीही समोर आली असून त्यापैकी ७ प्लॉट्स भुवनेश्वरमधील महत्त्वाच्या भागात असल्याचे सांगितले जात आहे.
अधिकाऱ्यांच्या माहितीनुसार, बेहेरा यांनी १९९९ मध्ये केवळ ६ हजार रुपये मासिक वेतनावर कनिष्ठ अभियंता म्हणून सरकारी सेवेत प्रवेश केला होता. त्यानंतर विविध विभागांमध्ये काम करत त्यांनी नुकतीच सहाय्यक कार्यकारी अभियंता पदावर बढती मिळवली होती.
या कारवाईदरम्यान त्यांच्या कुटुंबीयांच्या नावावरील बँक लॉकरची तपासणी करण्यात आली. लॉकर उघडताच त्यामध्ये २ कोटी रुपयांची रोख रक्कम आढळून आली. याआधी घराच्या झडतीत २.६६ लाख रुपयांची रोकडही जप्त करण्यात आली होती.
सध्या सोन्याचे दागिने, बँक ठेवी, गुंतवणूक, शेअर्स आणि इतर मालमत्तांचे मूल्यांकन सुरू आहे. तसेच जमिनी आणि इमारतींचे बाजारमूल्य निश्चित करण्याचे कामही सुरू आहे. तपास पूर्ण झाल्यानंतर बेहेरा यांच्या एकूण मालमत्तेचा आकडा आणखी वाढण्याची शक्यता अधिकाऱ्यांनी व्यक्त केली आहे.