PM Narendra Modi : पंतप्रधान मोदींची व्हेनेझुएलाच्या कार्यवाहक राष्ट्राध्यक्ष डेल्सी रोड्रिग्ज यांच्याशी महत्त्वपूर्ण बैठक

नवी दिल्ली : पंतप्रधान नरेंद्र मोदी (PM Narendra Modi) यांनी आज म्हणजेच गुरुवार ४ जून रोजी राष्ट्रीय राजधानी नवी दिल्ली येथे व्हेनेझुएलाच्या कार्यवाहक राष्ट्राध्यक्ष डेल्सी रोड्रिग्ज यांची भेट घेतली. हैदराबाद हाऊसमध्ये झालेल्या या बैठकीत भारत-व्हेनेझुएला संबंधांच्या विविध पैलूंवर चर्चा झाल्याची शक्यता आहे. विशेषतः ऊर्जा सुरक्षा, व्यापार व गुंतवणूक, औषधनिर्मिती (फार्मास्युटिकल्स), आरोग्य सेवा, वाहतूक आणि नवीकरणीय ऊर्जा या क्षेत्रांतील सहकार्यावर भर देण्यात आला.

पंतप्रधान नरेंद्र मोदी (PM Narendra Modi) यांची भेट घेतल्यानंतर डेल्सी रोड्रिग्ज यांनी नवी दिल्लीतील महात्मा गांधी यांच्या समाधीस्थळ राजघाट येथे जाऊन पुष्पांजली अर्पण केली आणि त्यांना श्रद्धांजली वाहिली.यापूर्वी परराष्ट्रमंत्री एस. जयशंकर यांनी डेल्सी रोड्रिग्ज यांची भेट घेत भारत आणि या दक्षिण अमेरिकन राष्ट्रामधील वाढत्या भागीदारीबाबत भारताची वचनबद्धता पुन्हा अधोरेखित केली. ‘एक्स’वरील पोस्टमध्ये जयशंकर यांनी म्हटले, “आज नवी दिल्लीमध्ये व्हेनेझुएलाच्या कार्यवाहक राष्ट्राध्यक्ष डेल्सी रोड्रिग्ज यांची भेट घेऊन आनंद झाला.” त्यांनी भारत-व्हेनेझुएला संबंधांप्रती त्यांच्या दीर्घकालीन बांधिलकीचे कौतुक केले. जयशंकर म्हणाले, “भारत-व्हेनेझुएला संबंधांबाबत त्यांची दीर्घकालीन वचनबद्धता मी अत्यंत महत्त्वाची मानतो.” तसेच त्यांनी सांगितले की, डेल्सी रोड्रिग्ज यांची पंतप्रधान नरेंद्र मोदी यांच्यासोबतची भेट दोन्ही देशांतील सहकार्य आणखी बळकट करेल. (PM Narendra Modi)

व्हेनेझुएलाच्या कार्यवाहक राष्ट्राध्यक्ष डेल्सी रोड्रिग्ज बुधवारी भारत आणि व्हेनेझुएला यांच्यातील द्विपक्षीय संबंध अधिक दृढ करण्याच्या उद्देशाने पाच दिवसांच्या अधिकृत दौऱ्यावर नवी दिल्ली येथे दाखल झाल्या.त्यांच्या स्वागतासाठी परराष्ट्र मंत्रालयाने ‘एक्स’वर पोस्ट करत म्हटले की, या भेटीमुळे दोन्ही देशांना परस्पर सहकार्य मजबूत करण्याची आणि द्विपक्षीय भागीदारीला नवी गती देण्याची संधी मिळेल. पोस्टमध्ये म्हटले होते, “नवी दिल्लीत आगमन झालेल्या व्हेनेझुएलाच्या कार्यवाहक राष्ट्राध्यक्ष डेल्सी रोड्रिग्ज यांचे हार्दिक स्वागत. आपल्या दौऱ्यादरम्यान त्या पंतप्रधान नरेंद्र मोदी (PM Narendra Modi) यांच्यासोबत द्विपक्षीय चर्चा करतील. ही भेट भारत-व्हेनेझुएला संबंध अधिक दृढ करेल आणि द्विपक्षीय भागीदारीला नवी चालना देईल.”

परराष्ट्र मंत्रालयाने जारी केलेल्या निवेदनानुसार, हा दौरा ३ जून ते ७ जूनदरम्यान होणार आहे. डेल्सी रोड्रिग्ज या यापूर्वी १ जून रोजी आंतरराष्ट्रीय बिग कॅट अलायन्स शिखर परिषदेत सहभागी होण्यासाठी भारतात येणार होत्या, मात्र ही परिषद नंतर पुढे ढकलण्यात आली. सध्या त्या व्हेनेझुएलाच्या परराष्ट्र व्यवहार, अर्थव्यवस्था व वित्त, विज्ञान व तंत्रज्ञान, संचार व माहिती तसेच वाहतूक मंत्र्यांसह उच्चस्तरीय शिष्टमंडळासोबत अधिकृत दौऱ्यावर भारतात आल्या आहेत. परराष्ट्र मंत्रालयाच्या माहितीनुसार, उच्चस्तरीय चर्चेदरम्यान दोन्ही देश भारत-व्हेनेझुएला संबंधांच्या सर्व पैलूंचा आढावा घेतील. तसेच ऊर्जा सुरक्षा, व्यापार व गुंतवणूक, औषधनिर्मिती, आरोग्य सेवा, वाहतूक आणि नवीकरणीय ऊर्जा यांसारख्या महत्त्वाच्या क्षेत्रांमध्ये सहकार्य अधिक वृद्धिंगत करण्याच्या मार्गांवर चर्चा होण्याची अपेक्षा आहे. (PM Narendra Modi)