Gold Smuggling at Mumbai Airport : मुंबई विमानतळावर सोन्याच्या तस्करीचा मोठा पर्दाफाश; दुबईहून आलेल्या प्रवाशांकडून ४.१९ कोटींचे सोने जप्त

मुंबई : छत्रपती शिवाजी महाराज आंतरराष्ट्रीय विमानतळावर सीमाशुल्क विभागाने सोन्याच्या तस्करीविरोधात मोठी कारवाई करत दुबईहून आलेल्या दोन प्रवाशांकडून तब्बल ४.१९ कोटी रुपये किमतीचे २.६ किलो सोने जप्त केले आहे. या कारवाईमुळे आंतरराष्ट्रीय तस्करीच्या जाळ्याचा पुन्हा एकदा पर्दाफाश झाला असून, या प्रकरणामागील मुख्य सूत्रधारांचा शोध घेण्यासाठी तपास यंत्रणांनी मोहीम सुरू केली आहे. (Gold Smuggling at Mumbai Airport)

मिळालेल्या माहितीनुसार, मुंबई सीमाशुल्क विभागाच्या हवाई गुप्तचर पथकाला दुबईहून मोठ्या प्रमाणात सोने तस्करी करून भारतात आणले जाणार असल्याची गोपनीय माहिती मिळाली होती. त्यानंतर अधिकाऱ्यांनी विमानतळाच्या आगमन विभागात सापळा रचून संशयित प्रवाशांवर नजर ठेवली. (Gold Smuggling at Mumbai Airport)

दुबईहून मुंबईत दाखल झाल्यानंतर संकेत गडावे (कोल्हापूर) आणि प्रतीक जाधव (सांगली) हे दोघे ‘ग्रीन चॅनेल’मधून बाहेर पडण्याच्या तयारीत असताना सीमाशुल्क अधिकाऱ्यांनी त्यांना ताब्यात घेतले. सुरुवातीला दोघांनीही आपल्याकडे कोणतीही संशयास्पद वस्तू नसल्याचा दावा केला. मात्र अधिकाऱ्यांच्या कसून चौकशीनंतर आणि वैयक्तिक झडतीदरम्यान धक्कादायक प्रकार उघडकीस आला. (Gold Smuggling at Mumbai Airport)

सीमाशुल्क कायदा १९६२ अंतर्गत घेण्यात आलेल्या झडतीमध्ये दोन्ही प्रवाशांच्या कपड्यांमध्ये काळ्या रंगाच्या पिशव्या लपवून ठेवण्यात आल्याचे आढळले. या पिशव्यांमध्ये मेणाच्या स्वरूपात सोन्याची धूळ लपविण्यात आली होती. तपासानंतर या सोन्याचे एकूण वजन सुमारे २.६ किलो असल्याचे निष्पन्न झाले. (Gold Smuggling at Mumbai Airport)

प्राथमिक चौकशीत आरोपींनी दुबईतील एका व्यक्तीकडून हे सोने स्वीकारल्याची कबुली दिली आहे. सीमाशुल्क विभागाची दिशाभूल करून हे सोने भारतात आणण्याचा त्यांचा प्रयत्न होता. अधिकाऱ्यांच्या माहितीनुसार, हे सोने कायदेशीर मार्गाने आयात करण्यात आले असते तर सरकारला सुमारे १.४६ कोटी रुपयांचा महसूल मिळाला असता. (Gold Smuggling at Mumbai Airport)

या प्रकरणात दोन्ही आरोपींना अटक करण्यात आली असून त्यांच्याकडून पुढील चौकशी सुरू आहे. तस्करीसाठी वापरण्यात आलेले नेटवर्क, भारतातील सोने स्वीकारणारे एजंट, तसेच हवाला व्यवहारांशी संबंधित कोणते धागेदोरे आहेत का, याचाही तपास केला जात आहे. (Gold Smuggling at Mumbai Airport)

दरम्यान, मुंबई विमानतळावर अलीकडच्या काळात सोन्याच्या तस्करीच्या घटनांमध्ये वाढ होत असल्याचे दिसून येत आहे. त्यामुळे सीमाशुल्क विभागाने सुरक्षा व्यवस्था आणखी कडक केली असून आंतरराष्ट्रीय विमानांमधून येणाऱ्या प्रवाशांवर विशेष नजर ठेवण्यात येत आहे. या कारवाईमुळे तस्करांना मोठा आर्थिक फटका बसला असून विमानतळावरील सुरक्षा यंत्रणांच्या सतर्कतेचे पुन्हा एकदा दर्शन घडले आहे. (Gold Smuggling at Mumbai Airport)