Crime : केडगाव गर्भलिंगनिदान प्रकरणाला नवे वळण ; उरुळी कांचन मधील डॉ. सुंदरम कदम संकटात

उरुळी कांचन : बहुचर्चित आणि बेकायदेशीर गर्भलिंगनिदान प्रकरणात तपासाची व्याप्ती वाढत आहे. उरुळी कांचन मधील डॉक्टर सुंदरम कदम आणि किकवी (ता. भोर) येथील डॉ. मंदार माळी हे या प्रकरणात सामील असल्याची माहिती पोलीस तपासात समोर आली आहे. यवत पोलिसांनी या दोन्ही आरोपींवर गुन्हा दाखल केला आहे. या कारवाईमुळे ग्रामीण भागातील गर्भलिंगनिदानाच्या संशयित रॅकेटची पाळेमुळे अधिक खोलवर असल्याची चर्चा सुरू झाली आहे. पोलिसांनी दिलेल्या माहितीनुसार, केडगाव गर्भलिंगनिदान प्रकरणाचा मुख्य आरोपी अण्णासाहेब गिरी याच्या चौकशी दरम्यान अनेक धक्कादायक आणि संतापजनक बाबी समोर आल्या आहेत. बेकायदेशीर सोनोग्राफी मशीनचा वापर करून गर्भलिंगनिदान करण्यात येत होतं, असं पोलीस तपासात समोर आलं. परंतु हे मशीन त्याला कोण देतं असा प्रश्न पोलिसांना सतावत आहे. मुख्य आरोपी अण्णासाहेब गिरीला पोलिसी खाक्या दाखवल्यावर त्याने मशीन आरोपी नरेंद्र ठाकरे याने पुरवल्याची कबुली दिली. यानंतर नरेंद्र ठाकरेला अटक करण्यात आली. सध्या तो न्यायालयीन कोठडीत आहे. आतापर्यंत या प्रकरणात पोलिसांनी ५ आरोपींना ताब्यात घेण्यात यश आलं आहे .सध्या सौंशयपद असेलेले दोन आरोपी डॉ. सुंदरम कदम व डॉ. मंदार माळी हे दोघेही सध्या फरार असल्याचे पोलिसांनी सांगितले आहे. यवत पोलिस त्यांचा शोध घेत आहेत. मुख्य आरोपी अण्णासाहेब गिरी आणि त्याचा साथीदार डॉ. अतुल जाधव यांना न्यायालयाने पुन्हा दोन दिवसांची पोलिस कोठडी सुनावली आहे. या संपूर्ण प्रकरणामुळे उरुळी कांचन परिसरात भीतीचं वातावरण आहे . डॉ. सुंदरम कदमच्या नावावरील संपत्तीची सखोल चौकशी करण्यात यावी, अशी मागणी पोलीस प्रशासनाकडे नागरिकांनी केली आहे . पोलिस उपनिरीक्षक मारोती मेतलवाड यांच्या मार्गदर्शनाखाली सखोल तपास सुरू असून, पुढील चौकशीत आणखी काही धक्कादायक माहिती समोर येण्याची शक्यता वर्तविली जात आहे.