मैसूर : बॉलिवूडचा लाडका आणि नेहमीच आपल्या सळसळत्या ऊर्जेसाठी ओळखला जाणारा आघाडीचा अभिनेता रणवीर सिंग (Ranveer Singh) सध्या त्याच्या चित्रपटांपेक्षा एका मोठ्या व्यावसायिक वादामुळे प्रसारमाध्यमांमध्ये चांगलाच चर्चेचा विषय बनला आहे. एकीकडे फरहान अख्तरच्या बहुप्रतिक्षित 'डॉन ३' (Don 3) या चित्रपटातून त्याने अचानक माघार घेतल्याच्या चर्चांना उधाण आले आहे, तर दुसरीकडे याच प्रकरणाची गंभीर दखल घेत 'फेडरेशन ऑफ वेस्टर्न इंडिया सिने एम्प्लॉईज' (FWICE) या चित्रपटसृष्टीतील महत्त्वाच्या संस्थेने त्याच्या विरोधात थेट 'असहकार्याचे' (Non-cooperation directive) आदेश जारी केले आहेत. यामुळे बॉलिवूड वर्तुळात मोठी खळबळ उडाली आहे. व्यावसायिक पातळीवर एवढे मोठे वादळ घोंघावत असतानाच, या सर्व तणावाच्या वातावरणात रणवीरने थेट अध्यात्माचा आधार घेतल्याचे पाहायला मिळत आहे. याच पार्श्वभूमीवर, मंगळवारी (२६ मे) रणवीर सिंगने थेट कर्नाटक गाठून म्हैसूर येथील अत्यंत प्राचीन, जागृत आणि प्रसिद्ध अशा श्री चामुंडेश्वरी मंदिरात (Chamundeshwari Temple) हजेरी लावली. तिथे त्याने देवीचे मनोभावे दर्शन घेतले आणि अत्यंत शांत चित्ताने, भक्तीभावाने एका विशेष पूजेचे आयोजनही केले.
मंदिरातून व्हिडिओ आला समोर
रणवीर सिंगच्या या मंदिर भेटीचे काही व्हिडिओ आणि फोटो सोशल मीडियावर मोठ्या प्रमाणात व्हायरल होत आहेत. या व्हिडिओंमध्ये रणवीर अत्यंत साध्या आणि पारंपरिक पोशाखात, शांत चित्ताने जमिनीवर बसून पूजा करताना दिसत आहे. विधी पूर्ण झाल्यानंतर त्याने तेथील मुख्य पुजाऱ्यांसोबत फोटोही काढले. वादविवादांच्या सावटातही रणवीरचा हा शांत आणि आध्यात्मिक अवतार चाहत्यांचे लक्ष वेधून घेत आहे.
वॉशिंग्टन : अमेरिकेत राहणाऱ्या भारतीय समुदायाला हादरवून सोडणारी एक अत्यंत धक्कादायक आणि दुर्दैवी घटना समोर आली आहे. अमेरिकेतील एका 'कन्वीनियन्स ...
...म्हणून रणवीरने घेतली मंदिराची पायरी!
रणवीर सिंग अचानक मंदिरात का गेला, असा प्रश्न अनेकांना पडला आहे. याचे कारण म्हणजे काही आठवड्यांपूर्वी कर्नाटक उच्च न्यायालयाने 'कांतारा' चित्रपटाशी संबंधित एका वादात रणवीरविरुद्ध दाखल झालेली एफआयआर (FIR) रद्द केली होती. 'कांतारा' चित्रपटातील एका दृश्याची रणवीरने नक्कल केली होती, ज्यामुळे धार्मिक भावना दुखावल्याचा आरोप काही संघटनांनी केला होता. एप्रिल २०२६ मध्ये झालेल्या सुनावणीदरम्यान, न्यायालयाने रणवीरची विनाअट माफी स्वीकारली आणि त्याला ४ आठवड्यांच्या आत मैसूरच्या चामुंडेश्वरी मंदिरात जाऊन दर्शन घेण्याचे आदेश दिले होते. न्यायालयाच्या याच आदेशाचे पालन करण्यासाठी रणवीर मंगळवारी मंदिरात पोहोचला होता.
मुंबई विमानतळावर लपवला चेहरा
कर्नाटकला रवाना होण्यापूर्वी रणवीर सिंगला मुंबई विमानतळावर स्पॉट करण्यात आले होते. यावेळी प्रसारमाध्यमांच्या नजरेपासून दूर राहण्यासाठी त्याने चेहऱ्यावर मास्क आणि डोळ्यांवर गॉगल लावला होता. वाद सुरू असल्याने त्याने लो-प्रोफाइल राहणे पसंत केले. मात्र, पांढरा कुर्ता-पायजामा आणि नेहरू जॅकेट अशा स्टायलिश लूकमध्ये कडक सुरक्षेत तो विमानतळावरून पुढे रवाना झाला.
'डॉन ३' चा नेमका काय आहे वाद?
रणवीर सिंगच्या या आध्यात्मिक दौऱ्याच्या मागे एक मोठा व्यावसायिक वादही सुरू आहे. 'डॉन ३' या बहुप्रतिक्षित चित्रपटातून रणवीरने अचानक माघार घेतल्याची जोरदार चर्चा आहे. यावरून 'फेडरेशन ऑफ वेस्टर्न इंडिया सिने एम्प्लॉईज' (FWICE) ने रणवीरविरुद्ध असहकार्याची भूमिका घेतली आहे. वारंवार बोलावूनही रणवीर या प्रकरणावर बाजू मांडण्यासाठी उपस्थित न राहिल्याने ही कारवाई करण्यात आल्याचे समजते. चित्रपटाचे दिग्दर्शक फरहान अख्तर आणि निर्माते रितेश सिधवानी यांनी या प्रकरणी चित्रपट मंडळाकडे तक्रार केली होती. ११ एप्रिल २०२६ रोजी ही तक्रार अधिकृतपणे FWICE कडे सोपवण्यात आली. निर्मात्यांच्या म्हणण्यानुसार, चित्रपटाच्या प्री-प्रॉडक्शनवर आधीच तब्बल ४५ कोटी रुपयांचा खर्च झाला आहे. अशा ऐन मोक्याच्या वेळी मुख्य अभिनेत्याने चित्रपटातून माघार घेतल्यामुळे निर्मात्यांचे प्रचंड आर्थिक नुकसान होऊ शकते, अशी चिंता फरहान अख्तरने व्यक्त केली आहे.
रणवीर सिंगच्या प्रवक्त्याने स्पष्ट केली बाजू
हा वाद वाढल्यानंतर रणवीर सिंगच्या टीमने अधिकृत पत्रक जारी करत आपली भूमिका स्पष्ट केली आहे. प्रवक्त्याने म्हटले आहे की, "रणवीर सिंगच्या मनात चित्रपटसृष्टी आणि 'डॉन' फ्रँचायझीबद्दल अत्यंत आदर आहे. या वादावर त्याने जाणीवपूर्वक मौन बाळगले आहे, कारण व्यावसायिक चर्चा आणि वैयक्तिक संबंध हे नेहमीच परिपक्वतेने आणि आदराने सोडवले पाहिजेत यावर त्याचा विश्वास आहे." पुढे असेही सांगण्यात आले की, "बाहेर अनेक प्रकारच्या अफवा आणि तर्कवितर्क लावले जात असले, तरी रणवीरला त्यावर जाहीरपणे बोलणे गरजेचे वाटत नाही. त्याचे पूर्ण लक्ष सध्या आगामी कामांवर आहे. तो या फ्रँचायझीला भविष्यासाठी शुभेच्छा देतो." एकीकडे 'डॉन ३' वरून वाद सुरू असला, तरी दुसरीकडे आदित्य धर दिग्दर्शित 'धुरंधर' या ब्लॉकबस्टर फ्रँचायझीमुळे रणवीर सिंग सध्या बॉक्स ऑफिसवर घवघवीत यश अनुभवत आहे.