Nashik : विवाहितकडे शरीरसुखाची मागणी करत अतिप्रसंग करण्याचा प्रयत्न, नाशिक शहरात खळबळ

Nashik : नाशिक शहराला नेमकी कोणाची नजर लागली हा प्रश्न आता नाशिकरांना पडला आहे. गेल्या अनेक दिवसांपासून वेगवेगळ्या गंभीर प्रकरणात नाशिक शहर राज्यात मोठ्या चर्चेत आहे. अशातच आता नाशिक शहरातील पंचवटी येथे गंभीर प्रकरण समोर आले आहे. मखमलाबाद रोडवरील जाधव कॉलनी परिसरात एका संशयिताने जुन्या ओळखीचा फायदा घेत थेट महिलेच्या घरात घुसून तिच्याकडे शरीर सुखाची मागणी केल्याचा गंभीर प्रकार समोर आला आहे.

नेमकं प्रकरण काय ?

मिळलेल्या प्राथमिक माहितीनुसार नाशिक शहरातील मखमलाबाद रोडवरील जाधव कॉलनी परिसरात हा अत्यंत गंभीर प्रकार समोर आला आहे. जुन्या ओळखीचा गैरफायदा घेत एका संशयिताने तिच्या घरात घुसून तिच्याकडे शरीरसंबंधाची मागणी केली. तसेच तिच्यावर अतिप्रसंग करण्याचा प्रयत्न केला. नराधम एवढ्यावरच थांबला नाही तर त्याने चाकूचा धाक दाखवत तिला आणि तिच्या मुलांना जीवे मारण्याची धमकी देखील दिली.

पुढे त्याने पीडितेला धमकावत म्हटलं की, "तुला दोन दिवसांची मुदत देतो, तुझी काय इच्छा आहे ते मला सांग." असे बोलून तो घटनास्थळावरून पसार झाला. या भयानक प्रकारामुळे पीडित महिला प्रचंड घाबरली. तिला मानसिक धक्का बसला. यातून तिने घरात असलेलं फिनाईल पिऊन आपली जीवनयात्रा संपवण्याचा प्रयत्न केला.

हा प्रकार लक्षात येताच तिला तातडीने रुग्णालयात दाखल करण्यात आले. सध्या तिच्यावर उपचार सुरू असून तिच्या प्रकृतीत सुधारणा होत असल्याची माहिती आहे. या प्रकरणी पीडित विवाहितेने रुग्णालयात दिलेल्या फिर्यादीवरून पंचवटी पोलिसांनी संशयित जय गणेश कोठुळे (वय २८, रा. दत्तनगर, पेठरोड, पंचवटी) याच्याविरुद्ध गुन्हा दाखल केला आहे.

तुझ्याकडे मोठ्या अपेक्षेने आलो आहे, नाही म्हणू नकोस

पोलिसांनी दिलेल्या माहितीनुसार, पीडित महिला ही दोन ते तीन वर्षांपूर्वी संशयित जय कोठुळे याच्या ऑफिसमध्ये कामाला होती. या जुन्या ओळखीचा गैरफायदा घेत आरोपीनं तिच्यावर अत्याचार करण्याचा प्रयत्न केला आहे. मंगळवारी दुपारी तीन ते चार वाजेच्या सुमारास विवाहित महिला घरात एकटीच होती. तिची दोन्ही मुलं घराबाहेर खेळायला गेली होती. घरात कुणी नसल्याचं हेरून संशयित जय कोठुळे हा जाधव कॉलनी परिसरातील पीडितेच्या घरात प्रवेश करताच त्याने थेट स्वयंपाकघरातील भाजी कापण्याचा चाकू हातात घेतला आणि पीडितेच्या जवळ गेला.

संशयित आरोपीने पीडितेला सोफ्यावर ढकलून तिच्यावर अतिप्रसंग करण्याचा प्रयत्न केला. तसेच "मी तुझ्याकडे मोठ्या अपेक्षेने आलो आहे, तू मला नाही म्हणू नकोस. जर तू नकार दिलास तर तुझ्या दोन्ही मुलांना ठार करेल. अशी धमकीही दिली. दरम्यान या प्रकरणी पंचवटी पोलिसांनी संशयित जय कोठुळे याच्याविरुद्ध गुन्हा दाखल केला आहे. या प्रकरणाचा पुढील तपास पोलिसांकडून सुरु आहे.