पंतप्रधान नरेंद्र मोदी (Prime Minister Narendra Modi) आणि इटलीच्या पंतप्रधान जॉर्जिया मेलोनी (itali Prime Minister Gorgia Meloni) यांची भेट नेहमीच इंटरनेटवर आणि आंतरराष्ट्रीय राजकारणात चर्चेचा विषय असते. आता पुन्हा एकदा या दोन नेत्यांच्या भेटीने आणि एका अत्यंत गोड 'गिफ्ट'ने सोशल मीडियावर तुफान धुमाकूळ घातला आहे. पंतप्रधान मोदींनी इटलीच्या पंतप्रधान मेलोनी यांना चक्क 'मेलोडी' (Melody) चॉकलेट्सची भेट दिली असून या भेटीचा व्हिडिओ सध्या इंटरनेटवर वेगाने व्हायरल होत आहे.
नेमके काय आहे या व्हायरल व्हिडिओमध्ये?
इटलीच्या पंतप्रधान जॉर्जिया मेलोनी यांनी बुधवारी त्यांच्या अधिकृत सोशल मीडिया अकाऊंटवरून पंतप्रधान मोदींसोबतचा एक हलकाफुलका आणि मजेशीर व्हिडिओ शेअर केला. या व्हिडिओला त्यांनी "Thank you for the gift" (भेटीबद्दल धन्यवाद) असे कॅप्शन दिले आहे. या व्हिडिओमध्ये मेलोनी अत्यंत आनंदाने आणि हसत हसत सांगत आहेत की, "पंतप्रधान मोदींनी मला एक खूप छान भेट दिली आहे, एक अतिशय उत्तम टॉफी - मेलोडी." मेलोनी यांचे हे वाक्य ऐकताच त्यांच्या शेजारी उभे असलेले पंतप्रधान मोदी देखील खळखळून हसताना दिसत आहेत. व्हिडिओच्या शेवटी दोन्ही नेते अत्यंत मैत्रीपूर्ण वातावरणात हसताना पाहायला मिळतात.
'मेलोडी' (Melody) आणि 'मेलोडी' (Melodi) मधील कनेक्शन
गेल्या काही महिन्यांपासून इंटरनेटवर 'Melodi' हा हॅशटॅग प्रचंड ट्रेंड होत आहे. 'मोदी' आणि 'मेलोनी' या दोन नावांचे एकत्रीकरण करून नेटकऱ्यांनी हा 'Melodi' शब्द तयार केला आहे. जेव्हा-जेव्हा हे दोन्ही नेते आंतरराष्ट्रीय व्यासपीठांवर भेटतात, तेव्हा इंटरनेटवर त्यांच्या मैत्रीपूर्ण भेटीचे मीम्स आणि व्हिडिओ व्हायरल होतात. विशेष म्हणजे, या दोन्ही जागतिक नेत्यांना या 'Melodi' ट्रेंडची कल्पना आहे आणि त्यांनी यापूर्वीही याला सकारात्मक दाद दिली आहे. आता थेट 'मेलोडी' चॉकलेट्स भेट देऊन मोदींनी या व्हायरल ट्रेंडला एक प्रकारे खऱ्याखुऱ्या गोडव्यात बदलले आहे.
रत्नागिरी : रत्नागिरी तालुक्यातील जांभारी फाटा परिसर मंगळवारी सकाळी भीषण स्फोटाने हादरला. वाटद पोलीस चौकी हद्दीत लाकडे गोळा करण्यासाठी गेलेल्या एका ...
नेटकऱ्यांच्या भन्नाट प्रतिक्रिया
मेलोनी यांनी हा व्हिडिओ पोस्ट करताच जगभरातील, विशेषतः भारतीय नेटकऱ्यांनी यावर प्रतिक्रियांचा पाऊस पाडला आहे. "Melody to Meloni" असा नवा ट्रेंड ट्विटर आणि इन्स्टाग्रामवर सुरू झाला आहे. आंतरराष्ट्रीय स्तरावरील राजकारणात असा निखळ आणि मैत्रीपूर्ण संवाद क्वचितच पाहायला मिळतो, असे मत अनेक युजर्स व्यक्त करत आहेत.
याआधीही रंगली होती 'Melodi' ची चर्चा
यापूर्वी दुबईमध्ये झालेल्या 'COP28' हवामान परिषदेदरम्यान मेलोनी यांनी पंतप्रधान मोदींसोबत एक सेल्फी शेअर केला होता. त्याला त्यांनी "Good friends at COP28. #Melodi" असे कॅप्शन दिले होते. तो सेल्फी देखील इंटरनेटवर प्रचंड गाजला होता. आता या नव्या 'मेलोडी टॉफी'च्या व्हिडिओने त्या आठवणींना पुन्हा एकदा उजाळा दिला आहे. राजकीय तणाव आणि जागतिक घडामोडींच्या गराड्यात, दोन देशांच्या प्रमुखांमधील हा खेळीमेळीचा क्षण सर्वांच्या चेहऱ्यावर हसू आणत आहे.