Congress : काँग्रेस नगरसेविकेसह ६ जणांवर अपहरणाचा गुन्हा

मुंबई : काँग्रेस नगरसेविका आशा कोपरकर आणि त्यांच्या कुटुंबावर एका ५६ वर्षीय महिला फॅशन डिझायनरने दिलेल्या तक्रारीनुसार अपहरणाचा गुन्हा दाखल झाला आहे. तक्रारदार महिलेची काँग्रेस नेते सुरेश कोपरकर यांच्याशी ओळख होती. त्यांच्यात कौटुंबिक आणि व्यावसायिक कारणांमुळे भेटीगाठी होत होत्या; मात्र सुरेश कोपरकर यांच्या घरच्यांना हा संबंध मंजूर नव्हता. ५ मे रोजी आशा कोपरकर यांच्या दोन्ही मुली, जावई आणि चालकाने महिलेचे घर गाठले. त्यांनी महिलेला घरातून बळजबरीने ओढत नेले आणि तिचे अपहरण केले.



तक्रारीनुसार महिलेला सुरेश कोपरकर यांच्या कार्यालयात नेण्यात आले. तिथे तिचे दोन्ही मोबाईल हिसकावून घेण्यात आले. तसेच महिलेच्या मदतीला आलेल्या एका तरुणालाही आरोपींनी बेदम मारहाण केली. नगरसेविका आशा कोपरकर यांनी महिलेला जीवे मारण्याची धमकी दिली. तसेच १४ मे रोजी महिलेला पुन्हा कार्यालयात बोलावले. तिची कार आणि मालमत्ता स्वतःच्या नावावर करण्यासाठी बळजबरीने सह्या मागितल्या. अखेर जीवाला भीती असल्याने पीडितेने पोलीस ठाण्यात धाव घेतली. भांडुप पोलिसांनी नगरसेविका आशा कोपरकर यांच्यासह सहा जणांवर गुन्हा दाखल केला असून महिला पोलीस निरीक्षक सविता जाधव या प्रकरणाचा तपास करत आहेत.