अमेरिकेचे माजी राष्ट्राध्यक्ष डोनाल्ड ट्रम्प (Donald Trump) यांनी गुरुवारी एका घटनेचा खळबळजनक खुलासा केला. त्यांच्या दाव्यानुसार, मध्यपूर्वेतील अत्यंत संवेदनशील मानल्या जाणाऱ्या 'होर्मुझच्या सामुद्रधुनीतून' (Strait of Hormuz) प्रवास करत असताना अमेरिकेच्या तीन विनाशक युद्धनौकांवर (Destroyers) अचानक गोळीबार आणि हल्ला करण्यात आला. सुदैवाने, या भ्याड हल्ल्यात अमेरिकेच्या जहाजांचे कोणतेही नुकसान झाले नाही. मात्र, या घटनेनंतर ट्रम्प यांनी इराणला अत्यंत कडक शब्दांत ताकीद दिली आहे. जर इराणने प्रस्तावित करारावर वेळेत स्वाक्षरी केली नाही, तर त्यांना अमेरिकेच्या अत्यंत विनाशकारी लष्करी कारवाईला सामोरे जावे लागेल, असा स्पष्ट इशारा त्यांनी दिला आहे.
'ट्रुथ सोशल'वरून इराणच्या कारवाईची उडवली खिल्ली
ट्रम्प यांनी त्यांच्या 'ट्रुथ सोशल' या समाजमाध्यमावरून या घटनेची सविस्तर माहिती दिली. ते म्हणाले, "आमच्या तीन जागतिक दर्जाच्या विनाशक नौकांनी गोळीबाराचा सामना करत होर्मुझच्या सामुद्रधुनीतून अत्यंत यशस्वीपणे मार्गक्रमण केले. आमच्या जहाजांना साधा ओरखडाही लागला नाही, मात्र हल्ला करणाऱ्या इराणी सैन्याची आम्ही दाणादाण उडवली. इराणचे कमकुवत नौदल ज्या छोट्या बोटींच्या जीवावर उड्या मारत होते, त्या बोटी अमेरिकन सैन्याने पूर्णपणे उद्ध्वस्त केल्या आहेत." ही घटना अशा वेळी घडली आहे, जेव्हा जागतिक स्तरावर खनिज तेलाच्या वाहतुकीसाठी अत्यंत महत्त्वाच्या मानल्या जाणाऱ्या 'होर्मुझच्या सामुद्रधुनीत' तणावाचे वातावरण आहे. गेल्या काही काळापासून या सागरी मार्गावर अमेरिका आणि इराण यांच्यात सातत्याने संघर्ष पाहायला मिळत असून, दोन्ही देशांकडून एकमेकांवर हल्ले आणि प्रतिहल्ले सुरू असल्याच्या बातम्या समोर येत आहेत.
"फुलपाखरासारखे समुद्रात कोसळले इराणचे ड्रोन"
या हल्ल्याचे अत्यंत नाट्यमय वर्णन करताना ट्रम्प यांनी अमेरिकन संरक्षण यंत्रणेचे कौतुक केले. ते म्हणाले की, अमेरिकन जहाजांवर इराणकडून डागण्यात आलेली क्षेपणास्त्रे अमेरिकेने अत्यंत सहजतेने हवेतच निकामी केली. तसेच, इराणने पाठवलेले ड्रोनही हवेतच जाळून खाक करण्यात आले. या घटनेची खिल्ली उडवत ट्रम्प यांनी लिहिले की, "ते ड्रोन आकाशातून थेट समुद्रात असे कोसळले, जणू एखादे फुलपाखरू मरून आपल्या थडग्यात पडत आहे!"
नाशिक : नाशिक येथील बहुचर्चित TCS धर्मांतर प्रकरणातील मुख्य संशयित आरोपी निदा खान (Nida Khan) हिला अखेर पोलिसांनी बेड्या ठोकल्या आहेत. गेल्या अनेक दिवसांपासून ...
"करार करा, अन्यथा कठोर परिणामांसाठी तयार राहा"
इराणला थेट अल्टिमेटम देताना ट्रम्प यांनी अत्यंत आक्रमक भाषा वापरली. त्यांनी म्हटले आहे की, जर इराणने त्यांच्या प्रलंबित करारावर लवकरात लवकर (FAST) स्वाक्षरी केली नाही, तर भविष्यात त्यांच्यावर यापेक्षाही भयानक आणि हिंसक हल्ला केला जाईल, ज्यातून ते सावरू शकणार नाहीत.
"इराणचे नेतृत्व वेड्यांच्या हातात"
ट्रम्प यांनी इराणला एक 'सामान्य देश' मानण्यास स्पष्ट नकार दिला. "एका सामान्य आणि सुसंस्कृत देशाने या युद्धनौकांना शांततेत जाऊ दिले असते, पण इराण हा काही सामान्य देश नाही. इराणचे नेतृत्व 'वेड्या' लोकांच्या (Lunatics) हातात आहे," अशी बोचरी टीका ट्रम्प यांनी केली. यासोबतच, इराणला कोणत्याही परिस्थितीत अण्वस्त्रे मिळवू न देण्याच्या अमेरिकेच्या ठाम भूमिकेचा त्यांनी पुन्हा एकदा पुनरुच्चार केला.
अमेरिकन नौदलाची 'स्टीलची भिंत'
हल्ल्यातून सुरक्षित बचावलेल्या या तीनही युद्धनौका आणि त्यांचे शूर कर्मचारी आता या प्रदेशातील अमेरिकन नौदलाच्या वेढ्यात (Naval Blockade) पुन्हा जाऊन सामील होतील, असे ट्रम्प यांनी अभिमानाने सांगितले. या मजबूत लष्करी वेढ्याला ट्रम्प यांनी 'स्टीलची भिंत' (Wall of Steel) अशी उपमा दिली आहे.
अमेरिकन लष्कराची (CENTCOM) अधिकृत भूमिका
ट्रम्प यांच्या या वक्तव्याच्या काही तास आधीच या भागात लष्करी कारवाई झाल्याचे वृत्त होते. 'यूएस सेंट्रल कमांड'ने (CENTCOM) दिलेल्या माहितीनुसार, अमेरिकन युद्धनौकांवर विनाकारण क्षेपणास्त्रे, ड्रोन आणि छोट्या बोटींद्वारे हल्ले करणाऱ्या इराणी लष्करी तळांना अमेरिकन सैन्याने लक्ष करून कारवाई केली. या संपूर्ण कारवाईत अमेरिकेच्या कोणत्याही लष्करी मालमत्तेचे किंवा सैनिकांचे नुकसान झालेले नाही, असे अमेरिकन लष्कराने स्पष्ट केले आहे.
इराणचा अमेरिकेवर पलटवार आणि कारवाईचा इशारा
दुसरीकडे, इराणने या घटनेवर तीव्र संताप व्यक्त केला आहे. इराणच्या सरकारी माध्यमांनी अमेरिकेवर शस्त्रसंधीचे उल्लंघन केल्याचा गंभीर आरोप लावला आहे. अमेरिकेने केशम बेट (Qeshm Island), बंदर खमीर आणि सिरिक या इराणी भूभागांवर तसेच नागरी किनारपट्टीवर विनाकारण हल्ले केल्याचा दावा इराणने केला आहे. तसेच, भविष्यात अमेरिकेने अशी कोणतीही आगळीक करण्याचा प्रयत्न केल्यास त्यांना 'विनाशकारी प्रत्युत्तर' दिले जाईल, असा गंभीर इशारा इराणने दिला आहे.