Nasarapur : नसरापूर घटनेतील आरोपीकडून संतापजनक कबुली, चिमुकलीचा जीव गेला की नाही हे पाहण्यासाठी चक्क…

Nasarapur Rape Case : पुणे जिल्ह्यामधील भोर तालुक्यातील नसरापूरमध्ये चिमुकलीवर झालेल्या संतापजनक प्रकार आणि नंतर तिला संपवल्याच्या घटनेनं संपूर्ण पुणे जिल्ह्यासह अख्खा महाराष्ट्रात संतापाची लाट उसळली आहे. या प्रकरणामुळे नागरिकांचा संताप वाढत असताना पुणे पोलिसांनी तपास आता अधिक वेगाने सुरू केला आहे. पोलिसांनी आरोपीविरुद्धचे सर्व पुरावे अन् खडानखडा माहिती गोळा केले असून आता फास्ट ट्रॅक कोर्टात (fast track court) हे प्रकरण चालवणार आहे. येत्या 10 दिवसात चार्जशीट दाखल होईल, अशी अपेक्षा आहे. (Nasarapur Rape Case)

आरोपीला घटनास्थळी नेऊन तपास

दरम्यान, या प्रकरणातील आरोपी, नराधम भीमराव कांबळेला कठोर शिक्षा व्हावी, अशी मागणी संपूर्ण महाराष्ट्रातून होत आहे. या प्रकरणासंबंधित सखोल तपासासाठी पोलिसांनी आरोपीला घटनास्थळी नेले. यावेळी त्याने अनेक गोष्टींची कबुली दिली.घटनेच्यावेळी आरोपी कुठे उभा होता? त्याने नक्की कशाप्रकारे हा गुन्हा केला? या सर्व बारीकसारीक गोष्टींचा पंचनामा पोलिसांनी घटनास्थळी केला. कायदेशीर प्रक्रिया पूर्ण करण्यासाठी पोलिसांनी हा निर्णय घेतला अन् आरोपीला गोठ्यात नेलं होतं. (Nasarapur Rape Case)

चिमुकलीच्या छातीत जोरदार बुक्की मारली

या तपासात धक्कादायक माहिती समोर आली आहे की, आरोपी भीमराव कांबळे बराच काळ गोठ्यातच थांबून होता. यावेळी त्याने मुलीचा जीव गेला आहे की नाही हे पाहण्यासाठी तिच्या छातीत जोरदार बुक्की मारली होती. पोलिसांकडून घटनास्थळी जाऊन केलेल्या तपासात हा हादरवणारा घटनाक्रम समोर आला आहे. (Nasarapur Rape Case)

पीडित कुटुंबाला शासकीय मदत देण्याची कार्यवाही सुरू

नसरापूर येथे घडलेली दुर्दैवी घटना अत्यंत धक्कादायक असून, पीडित कुटुंबाला राज्य सरकारकडून शासकीय मदत देण्याची कार्यवाही सुरू करण्यात आली असल्याची माहिती जिल्हाधिकारी जितेंद्र डुडी यांनी दिली.ते पत्रकारांशी बोलत होते. ते म्हणाले, ‘याबाबत संबंधित कुटुंबाने निवेदन दिले असून त्याची दखल घेत त्यावर कार्यवाही सुरू करण्यात आली आहे. तसे त्या कुटुंबाला लेखी कळविण्यात आले आहे. तसेच पुणे ग्रामीण पोलिसांनी तत्पर कारवाई करत गुन्हा दाखल करून आरोपीला अटक केली. या प्रकरणाची जलदगती न्यायालयात सुनावणी घेतली जाणार आहे. त्यासाठी विशेष वकिलाची नेमणूक करण्यात येणार असून, त्यांच्यामार्फत आरोपीस मृत्युदंड व्हावा, अशी मागणी करण्यात येणार आहे. संबंधित कुटुंबीयांना न्याय मिळवून देण्याबाबत प्रशासन कटिबद्ध आहे.’ असेही ते म्हणाले.