Iran - America War : इराणचा होर्मुझमध्ये अमेरिकेच्या युद्धनौकेवर हल्ला केल्याचा दावा

होर्मुज सामुद्रधुनीत अमेरिका आणि इराण यांच्यातील लष्करी तणाव पुन्हा एकदा तीव्र झाला आहे. इराणने दावा केला आहे की, सोमवारी त्यांनी एका अमेरिकन युद्धनौकेला होर्मुज सामुद्रधुनीत प्रवेश करण्यापासून रोखले आणि तिला परत फिरण्यास भाग पाडले. इराणी नौदलाच्या मते, त्यांनी तात्काळ आणि ठोस इशारा देऊन अमेरिकन-झायोनिस्ट युद्धनौकांना या संवेदनशील भागात प्रवेश करण्यापासून अडवले.

अमेरिकेने इराणला जहाजांवर हल्ला करू नये, असा कठोर इशारा दिला आहे. मात्र, इराणने अमेरिकन युद्धनौकेवर क्षेपणास्त्र हल्ला केल्याच्या दाव्यांना अमेरिकन अधिकाऱ्यांनी पूर्णपणे फेटाळून लावले आहे. अहवालानुसार, अमेरिकन अधिकाऱ्यांनी स्पष्ट केले आहे की, जर इराणने होर्मुज सामुद्रधुनीतून जाणाऱ्या जहाजांविरोधात कोणतीही कारवाई केली, तर त्याला कडक प्रत्युत्तर दिले जाईल.अमेरिकन सैन्याने इशारा दिला आहे की, इराणकडून डागण्यात येणारे कोणतेही क्षेपणास्त्र किंवा स्पीडबोट तत्काळ नष्ट करण्यात येईल.

इराणच्या अर्ध-सरकारी वृत्तसंस्थेने दावा केला की, इराणी इशाऱ्यांकडे दुर्लक्ष केल्यानंतर जास्क बेटाजवळ एका अमेरिकन युद्धनौकेवर दोन क्षेपणास्त्रे डागण्यात आली. हा परिसर सामुद्रधुनीच्या दक्षिण प्रवेशद्वाराजवळ असून, येथे इराणी नौदलाचा एक महत्त्वाचा तळ आहे. मात्र, पत्रकार बराक राविद यांच्या मते, एका वरिष्ठ अमेरिकन अधिकाऱ्याने या क्षेपणास्त्र हल्ल्याच्या बातमीचे तत्काळ आणि ठाम खंडन केले आहे. त्यांनी स्पष्ट केले की, कोणत्याही अमेरिकन युद्धनौकेवर क्षेपणास्त्र हल्ला झालेला नाही.

एका वृत्तसंस्थेनेही या इराणी दाव्यांची स्वतंत्रपणे पुष्टी करू शकलेली नाही. दरम्यान, या संपूर्ण घटनाक्रमावर अमेरिकेकडून अद्याप सविस्तर अधिकृत प्रतिक्रिया आलेली नाही. इराणने सोमवारी अमेरिकन सैन्याला या धोरणात्मक जलमार्गात प्रवेश करू नये, असा इशाराही दिला होता. हा इशारा अमेरिकेचे राष्ट्राध्यक्ष डोनाल्ड ट्रम्प यांनी खाडीमध्ये अडकलेल्या जहाजांना सुरक्षित बाहेर काढण्याबाबत केलेल्या विधानानंतर देण्यात आला.