कोल्हापूर: कोल्हापूर जिल्ह्यातील मलकापूर परिसरात एक धक्कादायक घटना उघडकीस आली आहे. सख्खा भाऊ पक्का वैरी झाल्याची प्रचिती याठिकाणी आली आहे. मूळचे छत्तीसगड राज्यातील रहिवासी असलेले मात्र सध्या पोट भरण्यासाठी कोल्हापूरमध्ये आलेल्या मोठ्या भावाने धाकट्या भावाचा निर्घृण खून केला आहे. सख्ख्या भावानेच अशाप्रकारे हत्या केल्याने हळहळ व्यक्त केली जात आहे. (Kolhapur Crime)
सख्खा भाऊ झाला पक्का वैरी (Kolhapur Crime)
मिळालेल्या माहितीनुसार, मृत व्यक्ती आणि त्याचा मोठा भाऊ हे दोघेही मूळचे छत्तीसगड (Chhattisgarh) राज्यातील रहिवाशी आहेत. काही महिन्यांपूर्वीच ते रोजगारासाठी कोल्हापूर जिल्ह्यात बांधकाम कामगार म्हणून आले होते. मलकापूर परिसरातील एका बांधकाम साईटवर ते वास्तव्यास होते. आज शनिवारी पहाटेच्या सुमारास दोघा भावांमध्ये अचानक जोरदार वाद झाला. या वाद इतका टोकाला पोहोचला की त्याचे रूपांतर पुढे हाणामारीत झाले. रागाच्या भरात मोठ्या भावाने जवळच पडलेली फारशी उचलून लहान भावाच्या डोक्यात घातली. हा वार इतका भीषण होता की, लहान भावाचा जागीच मृत्यू झाला. (Kolhapur Crime)
आरोपी घटनास्थळावरून पसार (Kolhapur Crime)
स्थानिकांकडून घटनेची माहिती मिळताच शाहूवाडी पोलीस ठाण्याचे पथक तातडीने घटनास्थळी दाखल झाले. पोलिसांनी रक्ताच्या थारोळ्यात पडलेला मृतदेह ताब्यात घेऊन तो उत्तरीय तपासणीसाठी पाठवला आहे. लहान भावाची हत्या केल्यानंतर आरोपी मोठा भाऊ घटनास्थळावरून पसार झाला आहे. त्याचा शोध पोलिसांकडून सुरु आहे.
हत्येचे कारण अस्पष्ट (Kolhapur Crime)
शाहूवाडी पोलिसांनी (Shahuwadi Police) याप्रकरणी खुनाचा गुन्हा दाखल केला असून आरोपीला पकडण्यासाठी युद्धपातळीवर प्रयत्न सुरू केले आहेत. परराज्यातून आलेल्या या कामगारांमध्ये नेमका कोणत्या कारणावरून वाद झाला? हे अद्याप स्पष्ट झालेले नाही. क्षुल्लक कारणावरून हे टोकाचे पाऊल उचलले की यामागे काही जुना वाद होता, याचा तपास आता पोलीस करत आहेत.
