क्रीडा विश्वाला हादरवून सोडणारी आणि अत्यंत संतापजनक अशी एक घटना नुकतीच उघडकीस आली आहे. दोन क्रिकेटपटूंनी एका हॉटेलमध्ये मुक्कामास असताना अतिशय नीच कृत्य केले आहे. या खेळाडूंनी त्याच हॉटेलमध्ये वास्तव्यास असलेल्या काही महिला डॉक्टरांचे बाथरूममध्ये अंघोळ करत असतानाचे अश्लील व्हिडीओ गुपचूप कॅमेऱ्यात कैद केले. या धक्कादायक प्रकाराची माहिती मिळताच संबंधित खेळाडूंवर तत्काळ गुन्हा दाखल करून त्यांच्यावर कायदेशीर कारवाई करण्यात आली. मात्र, या प्रकरणात न्यायालयात सुनावणी झाली असता, या दोन्ही आरोपी खेळाडूंची जामिनावर मुक्तता करण्यात आली आहे. या अत्यंत लज्जास्पद घटनेमुळे क्रिकेट विश्वाला मोठा कलंक लागला असून, या खेळाडूंच्या कृत्याबद्दल सर्वत्र तीव्र संताप व्यक्त केला जात आहे.
नेमकं प्रकरण काय ?
श्रीलंकेच्या १९ वर्षांखालील (U-19) संघातील दोन क्रिकेटपटूंच्या लज्जास्पद कृत्यामुळे मोठी खळबळ उडाली आहे. राजधानी कोलंबोच्या 'नाराहेनपिता' भागातील एका खासगी हॉटेलमध्ये हा धक्कादायक प्रकार घडला. एका बिझनेस मिटिंगसाठी या हॉटेलमध्ये मुक्कामाला असलेल्या महिला डॉक्टर बाथरूममध्ये असताना, या खेळाडूंनी भिंतीच्या फटी आणि छिद्रांमधून मोबाईलवर त्यांचे व्हिडिओ रेकॉर्ड केले. या घटनेची माहिती मिळताच नाराहेनपिता पोलिसांनी तत्काळ कारवाई करत या दोन्ही खेळाडूंना अटक केली आहे. विशेष म्हणजे, या विकृत आरोपींनी केवळ महिलांचेच नव्हे, तर हॉटेलमधील काही पुरुषांचेही व्हिडिओ रेकॉर्ड केल्याचे पोलिसांच्या प्राथमिक तपासात उघड झाले आहे. सध्या पोलिसांनी हे व्हिडिओ इंटरनेट किंवा कोणत्याही सोशल मीडिया प्लॅटफॉर्मवर अपलोड केले आहेत का, यादिशेने आपला पुढील तपास वेगाने सुरू केला आहे.