ठाणे : ठाणेकरांसाठी आजचा दिवस अतिशय आनंदाचा आणि वाहतूक व्यवस्थेतील एक महत्त्वाचा टप्पा ठरणारा आहे. ठाणे महानगरातील पहिल्यावहिल्या अत्याधुनिक 'इलेक्ट्रिक डबल डेकर बस'चे आज उपमुख्यमंत्री एकनाथ शिंदेंच्या उपस्थितीत थाटात लोकार्पण करण्यात आले. या बसचा पहिला उद्घाटनाचा प्रवास लुईसवाडी ते महापालिका भवन असा पार पडला. या नव्या बसमुळे ठाणेकरांचा दैनंदिन प्रवास आता अधिक आरामदायी आणि सुखकर होणार आहे.
एकाचवेळी ९८ प्रवाशांना करता येणार प्रवास
ही नवीन इलेक्ट्रिक डबल डेकर बस प्रवाशांच्या सोयीसाठी विशेष डिझाईन करण्यात आली असून तिची प्रवासी क्षमता मोठी आहे. या बसमध्ये एकाच वेळी ६५ प्रवासी बसून, तर ३३ प्रवासी उभे राहून (एकूण ९८ प्रवासी) अत्यंत आरामात प्रवास करू शकतील. सद्यस्थितीत ही बस ठाण्यातील अत्यंत वर्दळीच्या मानल्या जाणाऱ्या 'तीन हात नाका ते गायमुख' या महत्त्वाच्या मार्गावर प्रवाशांच्या सेवेसाठी धावणार आहे.
ठाणे परिवहन सेवेवर कोणताही आर्थिक भार नाही
या बसेस 'जी.सी.सी' (GCC - Gross Cost Contract) तत्त्वावर ठाणे परिवहन सेवेच्या (TMT) ताफ्यात दाखल केल्या जात आहेत. त्यामुळे या बसेसचा कोणताही अतिरिक्त आर्थिक भार परिवहन सेवेवर पडणार नाही, ही यातील एक मोठी जमेची बाजू आहे. ही बस १००% इलेक्ट्रिक असल्यामुळे शहरात वाढणारे प्रदूषण कमी होण्यास मदत होईल आणि ठाणेकरांचा प्रवास खऱ्या अर्थाने पर्यावरणपूरक होईल. या पहिल्या डबल डेकर बसच्या यशस्वी लोकार्पणानंतर, येत्या काळात आणखी ९ अत्याधुनिक इलेक्ट्रिक बसेस परिवहनच्या ताफ्यात दाखल होणार असल्याचे प्रशासनाकडून सांगण्यात आले आहे.